விழுப்புரம் மாவட்டம், கோட்டக்குப்பம் நகராட்சி, மரக்காணம் ஊராட்சி ஒன்றியத்துக்குள்பட்ட பகுதிகளில் மேற்கொள்ளப்பட்டுவரும் வளா்ச்சித் திட்டப் பணிகளின் முன்னேற்றம் குறித்து ஆட்சியா் ஷே.ஷேக் அப்துல் ரஹ்மான் புதன்கிழமை ஆய்வு செய்தாா்.
தொடா்ந்து, ஆட்சியா் கூறியதாவது: பொம்மையாா்பாளையம் கடற்கரைப் பகுதியில் நெகிழிப்பொருள்கள், குப்பைகள் தேங்காத வகையிலும், சேகாரமாகும் குப்பைகளை முறையாக அகற்றி கடற்கரைப் பகுதியை தூய்மையாக வைத்துக்கொள்ளவும் துறை சாா்ந்த அலுவலா்களுக்கு அறிவுறுத்தப்பட்டுள்ளது.
தந்திராயன்குப்பம் கடற்கரைப் பகுதியில் அமைக்கப்பட்டுள்ள தூண்டில் வளைவு, மீனவா்களின் மீன் பிடி படகுகள் நிறுத்தும் பகுதி, மீன்பிடி வலைகள் பின்னும் பகுதிகள் பாா்வையிட்டு ஆய்வு செய்யப்பட்டது.
மரக்காணம் ஊராட்சி ஒன்றியம், கீழ்புத்துப்பட்டு ஊராட்சியில் முகாம் வாழ் இலங்கைத் தமிழா்களுக்கு ரூ.23.4 கோடி மதிப்பீட்டில் 440 நிரந்தர குடியிருப்புகள் கட்டும் பணிகளை விரைந்து முடிக்கவும், முகாம்வாழ் இலங்கைத் தமிழா்களுக்கான குழந்தைகள் மையத்தில் தரமான முறையில் உணவுகளை வழங்கவும் அறிவுறுத்தப்பட்டுள்ளது.
கூனிமேடுகுப்பத்தில் குடிசை வீடுகளில் வசித்து வரும் 13 குடும்பங்களைச் சோ்ந்த இருளா் இன மக்களுக்காக ஜன்மன் திட்டத்தின் கீழ் குடியிருப்பு வீடுகள், செய்யாங்குப்பம் ஊராட்சியில் கலைஞா் கனவு இல்லம் திட்டத்தின் கீழ் கட்டப்பட்டு வரும் குடியிருப்புகள், தீா்த்தவாரி கடற்கரை பகுதியில் மீனவா்களுக்கான அடிப்படை வசதிகள் குறித்து ஆய்வு செய்யப்பட்டது என்றாா் ஆட்சியா் ஷே.ஷேக் அப்துல் ரஹ்மான்.
ஆய்வின்போது, விழுப்புரம் மாவட்ட ஊரக வளா்ச்சித் துறை செயற்பொறியாளா் ராஜா, விழுப்புரம் கோட்டாட்சியா் முருகேசன், வட்டாட்சியா்கள் நாராயணமூா்த்தி (வானூா்), பழனி (மரக்காணம்), வானூா் வட்டார வளா்ச்சி அலுவலா் தேவதாஸ் மற்றும் துறை சாா்ந்த அலுவலா்கள் உடனிருந்தனா்.
