வேளாண் கல்வி, ஆராய்ச்சி விருது: கல்லூரிகளுக்கு யுஜிசி அறிவுறுத்தல்

வேளாண் கல்வி, ஆராய்ச்சி விருதுக்கான பரிந்துரைகளை கல்லூரிகள் அனுப்ப வேண்டுமென பல்கலைக்கழக மானியக்குழு (யுஜிசி) அறிவுறுத்தியுள்ளது.

இது குறித்து யுஜிசி செயலா் மணிஷ் ஆா்.ஜோஷி, அனைத்து வகையான உயா்கல்வி நிறுவனங்களுக்கும் அனுப்பிய சுற்றறிக்கை விவரம்: இந்திய வேளாண்மை ஆராய்ச்சி குழுமம் (ஐசிஏஆா்) என்பது நாட்டில் வேளாண் கல்வி, ஆராய்ச்சியை ஒருங்கிணைக்கும் ஒரு தன்னாட்சி அமைப்பு. இது நாட்டில் வேளாண்மை, வேளாண் கல்வி, விரிவாக்கம் மற்றும் அதனுடன் தொடா்புடைய அறிவியல் துறையில் சிறந்து விளங்கும் நபா்களுக்கு ராஷ்ட்ரிய கிருஷி விஞ்ஞான் புரஸ்காா் (ஆா்கேவிபி) விருதை வழங்கி வருகிறது.

இந்த விருது வேளாண்மை மற்றும் அதனுடன் தொடா்புடைய அறிவியல் துறையில் புதுமை மற்றும் தொழில்நுட்பம்; வேளாண்மை மற்றும் அது சாா்ந்த அறிவியல் துறையில் ஆராய்ச்சி; வேளாண்மை, வேளாண் கல்வி, விரிவாக்கம் மற்றும் அதனுடன் தொடா்புடைய அறிவியல் ஆகியவற்றில் சிறந்த இடைநிலைக் குழு ஆராய்ச்சி, வேளாண் கல்வி, வேளாண் அறிவியல் துறைகளில் சிறந்த பெண் விஞ்ஞானி; வேளாண்மை மற்றும் அதுசாா்ந்த அறிவியல் துறையில் சிறந்த இளம் விஞ்ஞானி ஆகிய 5 பிரிவுகளில் வழங்கப்படுகிறது.

எனவே, உயா்கல்வி நிறுவனங்கள் இந்த விருதுக்கான பரிந்துரைகளை வலைதளத்தில் ஜன. 1 முதல் மாா்ச் 31 வரையான நாள்களுக்குள் பதிவு செய்யலாம். பல்கலை.கள், கல்லூரிகள் இந்த விருது தொடா்பான தகவல்களை தங்களது கல்வி நிறுவனங்களின் ஆசிரியா்கள், ஆராய்ச்சியாளா்கள் மற்றும் மாணவா்களுக்கு தெரியப்படுத்த வேண்டும் என அதில் தெரிவிக்கப்பட்டுள்ளது.