4 மாத சிசு சடலம் தோண்டி எடுப்பு

சத்தியமங்கலம் அருகே 4 மாதம் கருவுற்ற சிறுமி திருமணம் ஆன 2 நாள்களில் உடல்நலம் பாதிக்கப்பட்டு கோவை மருத்துவமனையில் சிகிச்சை பலனின்றி உயிரிழந்தாா்.

இது தொடா்பாக, கைதான சிறுமியின் கணவா் சக்திவேல் அளித்த வாக்குமூலத்தின் அடிப்படையில் புன்செய்புளியம்பட்டியில் புதைக்கப்பட்ட சிறுமியின் சிசுவின் உடலைத் தோண்டி எடுத்து பரிசோதனைக்கு அனுப்பி வைத்துள்ளனா்.

ஈரோடு மாவட்டம், சத்தியமங்கலத்தை அடுத்துள்ள கிராமத்தைச் சோ்ந்த கூலித் தொழிலாளியின் 17 வயது ஆன மகள் பள்ளிக்கு செல்லாமல் வீட்டில் இருந்துள்ளாா். இவரது பெற்றோா் காலையில் கூலி வேலைக்கு சென்றுவிட்டு மாலையில்தான் வீடு திரும்புவாா்கள். வீட்டில் தனிமையில் இருந்த சிறுமிக்கும் சிறுமியின் உறவுக்காரான தாண்டாம்பாளையம் சக்திவேல் (31) என்பவருக்கும் இடையே பழக்கம் ஏற்பட்டது.

இதன் காரணமாக சிறுமி கருவுற்றாா். இதையடுத்து கடந்த 10 நாள்களுக்கு முன் கருவுற்ற சிறுமியை கா்ப்பமாக்கிய சக்திவேல் திருமணம் செய்து கொண்டாா். இந்நிலையில் கடந்த 16ம் தேதி வயிறு வலிப்பதாக சிறுமி தனது தாயிடம் கூறிய நிலையில் சத்தியமங்கலம் அரசு மருத்துவமனைக்கு அழைத்துச் செல்லப்பட்டாா்.

பின்னா் அங்கிருந்து கோவை அரசு மருத்துவமனையில் அனுமதிக்கப்பட்டு சிகிச்சை பெற்று வந்த நிலையில் சிகிச்சை பலனின்றி சிறுமி 17ஆம் தேதி உயிரிழந்தாா். இதையடுத்து புன்செய்புளியம்பட்டி காவல் நிலையத்தில் அவரது தாய் புகாா் அளித்ததைத் தொடா்ந்து சிறுமியைத் திருமணம் செய்த வழக்கில் சக்திவேல் மீது போக்ஸோ வழக்குப் பதிவு செய்து கைது செய்தனா்.

சிறுமி இறப்பு குறித்து போலீஸாா் தொடா் விசாரணை மேற்கொண்டபோது அதிா்ச்சி தகவல் வெளியாகியுள்ளது. இது குறித்து போலீஸாா் செவ்வாய்க்கிழமை கூறுகையில்

சிறுமிக்கு கருக்கலைப்பு செய்ததாகவும், சிதைந்த சிசுவின் பாகங்களை பிளாஸ்டிக் பையில் போட்டு புன்செய்புளியம்பட்டி வாரச்சந்தை அருகே குப்பையில் புதைத்ததாகவும் சக்திவேல் அளித்த வாக்குமூலத்தின்படி சத்தியமங்கலம் வட்டாட்சியா் ஜமுனாராணி முன்னிலையில் பெருந்துறை மருத்துவக் கல்லூரி தலைமை மருத்துவா் நந்தகுமாா் புதைக்கப்பட்ட சிசுவின் உடல் உறுப்புகளை ஆய்வுக்கு எடுத்துச் சென்றதாகவும் தெரிவித்தனா்.