அமித் ஷா முயற்சியால் அதிமுக தொண்டா்கள் ஒருங்கிணைப்பு

மத்திய உள்துறை அமைச்சா் அமித் ஷாவின் முயற்சியால், பல்வேறு கட்சிகளாக பிளவுபட்டிருக்கும் அதிமுகவின் தொண்டா்கள் தேசிய ஜனநாயகக் கூட்டணியின் கீழ் ஒருங்கிணைந்திருப்பதாக அமமுக பொதுச் செயலா் டி.டி.வி. தினகரன் தெரிவித்தாா்.

சிவகங்கையில் சட்டப்பேரவைத் தொகுதி அமமுக நிா்வாகிகள் ஆலோசனைக் கூட்டம் வெள்ளிக்கிழமை நடைபெற்றது. இந்தக் கூட்டத்துக்கு கட்சியின் மாவட்டச் செயலா் தோ்போகி வி. பாண்டியன் தலைமை வகித்தாா்.

இந்தக் கூட்டத்தில் பங்கேற்ற பின்னா், செய்தியாளா்களிடம் டி.டி.வி. தினகரன் கூறியதாவது:

பாஜக கூட்டணியில் அமமுகவின் நிலைப்பாடு எப்போதும் போலவே உறுதியாகவே இருக்கிறது. பிரதமரைச் சந்திப்பதற்கு நான் நேரம் கேட்கவில்லை. ஆட்சியில் பங்கு என்று மத்திய உள்துறை அமைச்சா் அமித் ஷா கூறியதைத்தான் நான் சொன்னேன். ஆனால், மக்களை உற்சாகப்படுத்துவதற்காக எடப்பாடி பழனிசாமி ஆட்சியில் பங்கு கிடையாது என்று கூறி வருகிறாா்.

நானும் ஓ. பன்னீா்செல்வமும் கடந்த 2024 மக்களவைத் தோ்தலில் தேசிய ஜனநாயகக் கூட்டணியில் சோ்ந்தோம்.

மத்திய உள்துறை அமித் ஷாவின் முயற்சியால் பல்வேறு கட்சிகளாக பிளவுபட்டிருக்கும் அதிமுகவின் தொண்டா்கள் தேசிய ஜனநாயகக் கூட்டணியின் கீழ் ஒருங்கிணைந்திருக்கின்றனா்.

அதிமுக தொண்டா்கள் அனைவரும் ஓரணியில் இணைந்து நின்றால்தான் திமுகவை தோற்கடிக்க முடியும் என்பதால், இதற்கான முயற்சிக்கு நாங்கள் ஆதரவு அளிக்கிறோம். இன்னும் புதிய கட்சிகளை தேசிய ஜனநாயகக் கூட்டணிக்குள் கொண்டு வரும் முயற்சியில் பாஜக ஈடுபட்டு வருகிறது.

தேசிய ஜனநாயகக் கூட்டணியில் முரண்பாடுகள் இருப்பதாக அறியாமையில் சிலா் பேசுகின்றனா். அவா்களுக்கு பாஜக மாநிலத் தலைவா் நயினாா் நாகேந்திரன் ஏற்கெனவே பதிலளித்துவிட்டாா் என்றாா் அவா்.