திருவள்ளூா் வட்டாட்சியா் அலுவலகம் அருகே அரை ஏக்கா் நிலத்தில் ரூ. 7.50 கோடியில் அனைத்து வசதியுடன் நகராட்சி மேல்நிலைப் பள்ளிக்கான கூடுதல் வகுப்பறை கட்டுமானப் பணிகள் விரைவில் நிறைவு செய்து பயன்பாட்டுக்கு கொண்டு வர பொதுமக்களிடையே கோரிக்கை எழுந்துள்ளது.
திருவள்ளூா் நகராட்சி மேல்நிலைப் பள்ளி பேருந்து நிலையம் அருகே இட நெருக்கடியுடன் செயல்பட்டு வருவதாகக் கூறப்படுகிறது. இந்தப் பள்ளியை மாவட்ட தலைநகரில் சிறந்த பள்ளியாக உருவாக்கவும், அனைவரும் வந்து செல்லும் இடத்தில் அமைக்கவும் திட்டமிடப்பட்டது. அந்த வகையில், திருவள்ளூா் வட்டாட்சியா் அலுவலகம் அருகே சென்னை-திருப்பதி தேசிய நெடுஞ்சாலையில் அரை ஏக்கா் நிலத்தை தனியாா் ஆக்கிரமிப்பில் இருந்தது ஆய்வில் தெரியவந்தது. அதை ஆவணங்களில் சரி பாா்த்தபோது, அரசு நிலம் என்பது தெரியவந்தது. அதைத் தொடா்ந்து, அதிகாரிகள் அந்த அரை ஏக்கா் நிலத்தை போா்க்கால அடிப்படையில் மீட்டனா். பின்னா் அந்த இடத்தை இட நெருக்கடியுடன் செயல்பட்டு வரும் திருவள்ளூா் நகராட்சி மேல்நிலைப் பள்ளிக்கு ஒப்படைக்கப்பட்டது. இந்தப் பள்ளியில் 1 முதல் பிளஸ் 2 வகுப்பு வரை மாணவ, மாணவிகள் 700-க்கும் மேற்பட்டோா் பயின்று வருகின்றனா். இந்த நிலையில், பெற்றோா் தங்கள் குழந்தைகளை இந்தப் பள்ளியில் சோ்க்க முன்வரும் நிலையில் இடநெருக்கடியும் உள்ளது.
அதனால், இந்த அரை ஏக்கா் நிலத்தில் கூடுதல் மாணவ, மாணவிகளை சோ்க்கும் வகையில் கூடுதல் வகுப்பறைகள் அமைக்கவும் திருவள்ளூா் சட்டப்பேரவை உறுப்பினா் வி.ஜி.ராஜேந்திரனிடம், நகா்மன்றத் தலைவா் உதயமலா் பாண்டியன் கோரிக்கை விடுத்திருந்தாா். அதன்பேரில், முதல் கட்டமாக சட்டப்பேரவை உறுப்பினா் மேம்பாட்டு நிதி ரூ. 50 லட்சம், நகராட்சி நிதி ரூ. 1 கோடி, அரசு சாா்பில் ரூ. 2.25 கோடியும் ஒதுக்கப்பட்டது. தற்போதைய நிலையில் கூடுதல் வகுப்பறைகள் அனைத்து வசதியுடன் அமைக்கும் பணி மும்முரமாக நடைபெற்று வருவதாக அதிகாரிகள் தெரிவித்தனா்.
இது குறித்து திருவள்ளூா் நகா்மன்றத் தலைவா் உதயமலா் பாண்டியன் கூறியதாவது:
இந்தப் பள்ளிக்கு தரைத் தளத்தில்-10, முதல் தளத்தில்-10 என 20 வகுப்பறைகள் அனைத்து நவீன வசதிகளுடன் அமைக்கப்பட்டுள்ளது. அத்துடன், கூடுதல் வகுப்பறை வளாகத்தில் அறிவியல் ஆய்வுக் கூடம், அலுவலகக் கூடம், ஒவ்வொரு வளாகத்தில் மாணவ, மாணவிகளுக்கு ஆழ்துளைக் கிணறு வசதியுடன் தனித்தனியாக சுகாதார வளாகங்கள் அமைக்கப்பட்டுள்ளன.
இந்தப் பணிகளை விரைவில் முடிக்கும் வகையில், மீதமுள்ள ரூ. 3.75 கோடியை ஒதுக்கவும் கோரிக்கை விடுக்கப்பட்டுள்ளது. நிகழ் கல்வியாண்டில் அனைத்து பணிகளும் முடித்து பயன்பாட்டுக்கு கொண்டு வரவும் திட்டமிடப்பட்டுள்ளதாக அவா் தெரிவித்தாா்.
