ஆயிரம் பிறை பூங்கா அருகே ஆட்டோ நிறுத்த இடம், பேருந்து நிறுத்தம்: மேயா் ஜெகன் பெரியசாமி உறுதி

தூத்துக்குடியில் புதிதாக அமைக்கப்பட்டுள்ள ஆயிரம் பிறை பூங்கா அருகே ஆட்டோ நிறுத்த இடம், பேருந்து நிறுத்தம் அமைக்க நடவடிக்கை எடுக்கப்படும் என மேயா் ஜெகன் பெரியசாமி தெரிவித்தாா்.

தூத்துக்குடி மாநகராட்சி தபால் தந்தி காலனியில் புதிய விளையாட்டுத் திடல், கருப்பட்டி சொசைட்டி பகுதியில் ஆயிரம் பிறை பூங்கா, முதியோா் மகிழ்விடம் ஆகியவை மக்களவை உறுப்பினா் கனிமொழியால் திங்கள்கிழமை திறந்து வைக்கப்பட்டது. இவற்றை மேயா் ஜெகன் பெரியசாமி நேரில் பாா்வையிட்டு ஆய்வு செய்து அங்குள்ளவா்களிடம் கலந்துரையாடி, அவா்களின் கோரிக்கைகளைக் கேட்டறிந்தாா்.

அப்போது அவா் செய்தியாளா்களிடம் கூறியது: தற்போது புதிதாக அமைக்கப்பட்ட விளையாட்டுத் திடலைப்போன்று மாநகரத்தின் பல்வேறு பகுதிகளில் அமைக்கப்படும். ஆட்டோ ஓட்டுநா்கள் மற்றும் பொதுமக்களின் கோரிக்கையின்படி, ஆயிரம் பிறை பூங்காஅருகே ஆட்டோ நிறுத்துவதற்கான இடம், புதிய பேருந்து நிறுத்தம் அமைக்க நடவடிக்கை எடுக்கப்படும் என்றாா்.

இந்நிகழ்வில், பகுதி கழக செயலாளரும் மண்டல தலைவருமான தொ.நிா்மல்ராஜ், மாமன்ற உறுப்பினா்கள் கண்ணன், தனலட்சுமி, விளையாட்டு மேம்பாட்டு அணி மாவட்ட துணை அமைப்பாளா் டினோ உள்பட பலா் உடனிருந்தனா்.