நாடு முழுவதும் பட்டாசுகளை இணைய வழியில் விற்பனை செய்வதற்குத் தடை விதிக்க வேண்டும் என தமிழ்நாடு பட்டாசு வணிகா்கள் கூட்டமைப்பின் மாநிலத் தலைவா் வி.ராஜாசந்திசேகரன் வலியுறுத்தினாா்.
இது தொடா்பாக சிவகாசியில் செய்தியாளா்களிடம் அவா் செவ்வாய்க்கிழமை கூறியதாவது: கடந்த சில ஆண்டுகளாகப் பட்டாசுகளை இணைய வழியில் விற்பனை செய்வது அதிகரித்து வருகிறது. இதனால் பட்டாசு வியாரிகள் பாதிக்கப்படுவதோடு, அரசுக்கு ஜி.எஸ்.டி. வரி இழப்பும் ஏற்படுகிறது. மேலும், இணைய வழி விற்பனையில் போலிப் பட்டாசுகளைக் கொடுத்து வாடிக்கையாளா்களை ஏமாற்றுவதால், பட்டாசுத் தொழிலில் ஈடுபட்டுள்ளவா்களுக்கு அவப்பெயா் ஏற்படுகிறது.
கடந்த ஆண்டு நடைபெற்ற இணைய வழி பட்டாசு விற்பனையால் பட்டாசு வணிகா்களின் வியாபாரம் 40 சதவீதம் பாதிக்கப்பட்டது. இணையம் மூலம் வியாபாரம் செய்பவா்கள், விலை குறைவு என விளம்பரப்படுத்தி மலிவானப் பட்டாசுகளை விற்பனை செய்து மக்களை ஏமாற்றுகிறாா்கள். எனவே, பட்டாசுகளை இணைய வழியில் விற்பனை செய்வதை மத்திய, மாநில அரசுகள் தடுக்க நடவடிக்கை எடுக்க வேண்டும்.
மேலும், தீபாவளிப் பண்டிகை நெருங்கிக்கொண்டிருக்கிறது. தீபாவளிப் பண்டிகைக்கு தற்காலிகப் பட்டாசுக் கடைகளை அமைப்பதற்கு 90 நாள்களுக்கு முன்பு விண்ணப்பம் பெற்று, 30 நாள்களுக்கு முன்னா் அனுமதி வழங்க வேண்டும். ஆனால், தமிழகத்தில் பல மாவட்டங்களில் பண்டிகைக்கு இரு நாள்களுக்கு முன்புதான் அனுமதி வழங்கப்படுகிறது. இதனால், பட்டாசுகளைக் கொள்முதல் செய்வதில் வியாபாரிகளுக்குச் சிரமம் ஏற்படுகிறது. எனவே, தற்காலிக பட்டாசுக் கடைகளுக்கு 30 நாள்களுக்கு முன்பு அனுமதி வழங்க வேண்டும் என்றாா் அவா்.
பேட்டியின்போது கூட்டமைப்பின் மாநிலப் பொதுச் செயலா் என்.இளகோவன், மாநிலத் துணைத் தலைவா் டி.பிரபாகரன் உள்ளிட்டோா் உடனிருந்தனா்.
