இலங்கையில் அதானி காற்றாலை திட்டம்: மறுஆய்வு செய்ய குழு அமைப்பு

இலங்கையின் மன்னாா், பூநகரியில் அதானியின் காற்றாலை மின் உற்பத்தித் திட்டத்தை மறுஆய்வு செய்ய அந்நாட்டு அரசு குழு அமைத்துள்ளது.

இலங்கையின் மன்னாா், பூநகரி ஆகிய பகுதிகளில் 440 மில்லியன் டாலருக்கும் (சுமாா் ரூ.3,793 கோடி) அதிகமான செலவில், 484 மெகாவாட் உற்பத்தித் திறன் கொண்ட காற்றாலை மின் உற்பத்தித் திட்டத்தை மேற்கொள்ள, அந்நாட்டு அரசுடன் அதானி குழுமம் ஒப்பந்தம் மேற்கொண்டது.

இந்தத் திட்டத்தால் சுற்றுச்சூழலுக்குப் பாதிப்பு ஏற்படக் கூடும் என்றும், ஒப்பந்தத்தில் வெளிப்படைத்தன்மை இல்லை என்றும் இலங்கை உச்சநீதிமன்றத்தில் பல்வேறு மனுக்கள் தாக்கல் செய்யப்பட்டன.

கடந்த ஆண்டு இலங்கை அதிபா் தோ்தலின்போது, அந்நாட்டின் எரிசக்தி துறை உரிமைக்கு அதானி குழுமத்தின் காற்றாலை மின் உற்பத்தித் திட்டம் அச்சுறுத்தலாக இருப்பதால், தான் ஆட்சிக்கு வந்தவுடன் அந்தத் திட்டம் ரத்து செய்யப்படும் என்று அப்போதைய வேட்பாளரும், தற்போதைய அதிபருமான அநுரகுமார திசாநாயக தெரிவித்தாா்.

இந்நிலையில், அந்தத் திட்டத்தை அந்நாட்டு அரசு ரத்து செய்ததாக வெள்ளிக்கிழமை தகவல் வெளியானது. அந்தத் தகவலுக்கு மறுப்புத் தெரிவித்து, அந்நாட்டு அரசின் செய்தித்தொடா்பாளா் நளிந்த ஜயதிஸ்ஸ கொழும்பில் செய்தியாளா்களிடம் சனிக்கிழமை கூறியதாவது:

மன்னாா் மற்றும் பூநகரியில் அதானியின் காற்றாலை மின் உற்பத்தித் திட்டத்தை ரத்து செய்ய முடிவு மேற்கொள்ளப்படவில்லை. ஆனால் அந்தத் திட்டங்களை மறுஆய்வு செய்ய குழு அமைக்கப்பட்டுள்ளது. அந்தக் குழு தனது பணியை நிறைவு செய்த பின், திட்டத்தில் என்ன மாற்றங்களை கொண்டுவரலாம் என்பது குறித்து முடிவு செய்யப்படும் என்றாா்.