உயா்நீதிமன்ற நீதிபதி குறித்து வழக்குரைஞா் விமா்சித்த விவகாரம்: தலைமை நீதிபதிக்கு பரிந்துரை

உயா்நீதிமன்ற நீதிபதி ஜி.ஆா். சுவாமிநாதனை விமா்சித்து, சமூக ஊடகங்களில் வழக்குரைஞா் ஒருவா் பேசியது தொடா்பான பதிவுகளை சென்னை உயா்நீதிமன்றத் தலைமை நீதிபதி அமா்வின் நடவடிக்கைக்கு அனுப்ப திங்கள்கிழமை உத்தரவு பிறப்பிக்கப்பட்டது.

உயா்நீதிமன்ற நீதிபதி ஜி.ஆா். சுவாமிநாதனின் தீா்ப்புகள் தொடா்பாக வழக்குரைஞா் வாஞ்சிநாதன் சில குற்றச்சாட்டுகளை முன்வைத்து உச்சநீதிமன்றத் தலைமை நீதிபதிக்கு கடிதம் அனுப்பினாா். அந்தக் கடிதம் அண்மையில் சமூக ஊடகங்களில் வெளியானது.

இந்த நிலையில், விசாரணையில் உள்ள ஒரு வழக்கின் வழக்குரைஞா் என்ற அடிப்படையில், உயா்நீதிமன்ற நீதிபதிகள் ஜி.ஆா். சுவாமிநாதன், ராஜசேகரன் அமா்வில் முன்னிலையாக வழக்குரைஞா் வாஞ்சிநாதனுக்கு அழைப்பாணை அனுப்பப்பட்டது. இதன்படி, நீதிபதிகள் ஜி.ஆா். சுவாமிநாதன், ராஜசேகரன் அமா்வில் வழக்குரைஞா் வாஞ்சிநாதன் கடந்த வெள்ளிக்கிழமை (ஜூலை 25) முன்னிலையானாா்.

அப்போது, ‘என்னுடைய தீா்ப்புகள் குறித்து சமூக ஊடகங்களில் தாங்கள் தெரிவித்த கருத்துகளில் தற்போதும் உறுதியாக உள்ளீா்களா?’ என வழக்குரைஞா் வாஞ்சிநாதனிடம் நீதிபதி ஜி.ஆா். சுவாமிநாதன் கேள்வி எழுப்பினாா். இதற்கு, எழுத்துப்பூா்வமாக கேட்டால் விளக்கம் அளிப்பதாக வழக்குரைஞா் வாஞ்சிநாதன் பதில் அளித்தாா். பிறகு, இதுகுறித்து திங்கள்கிழமை (ஜூலை 28) இதே அமா்வில் வாஞ்சிநாதன் பதில் அளிக்க வேண்டும் என நீதிபதிகள் உத்தரவிட்டனா்.

இதையடுத்து, உயா்நீதிமன்ற நீதிபதிகள் ஜி.ஆா். சுவாமிநாதன், ராஜசேகரன் அமா்வில் வழக்குரைஞா் வாஞ்சிநாதன் திங்கள்கிழமை முன்னிலையானாா். அப்போது, தமிழக முதல்வருக்கு பல்கலைக்கழக வேந்தராக செயல்படுவதற்கு அதிகாரம் வழங்கும் சட்டத்துக்குத் தடை கோரிய வழக்கில், நீதிபதி ஜி.ஆா். சுவாமிநாதன் அமா்வின் விசாரணையை விமா்சித்து வழக்குரைஞா் வாஞ்சிநாதன் சமூக ஊடகத்தில் கருத்து தெரிவித்த விடியோ நீதிமன்றத்தில் ஒளிபரப்பட்டது.

பிறகு, ‘இந்தப் பதிவில் நீதித் துறையை தாங்கள் கடுமையாக விமா்சித்துள்ளீா்கள். இது தொடா்பாக தற்போது தங்களுடைய கருத்து என்ன?’ என வழக்குரைஞா் வாஞ்சிநாதனிடம் நீதிபதி ஜி.ஆா். சுவாமிநாதன் கேள்வி எழுப்பினாா்.

அப்போது, ‘இந்த விடியோவுக்கும், தற்போது நடைபெறும் விசாரணைக்கும் தொடா்பு இல்லை. ஒரு விடியோவை ஒளிபரப்பி, அதுகுறித்து உடனடியாக விளக்கம் கேட்பது ஏற்புடையதல்ல. எழுத்துப்பூா்வமாக விளக்கம் கேட்டால், விளக்கம் அளிக்கத் தயாா். மேலும், தங்கள் மீது நான் தெரிவித்த புகாா் தொடா்பாக தாங்களே விசாரிக்க முடியாது’ என வழக்குரைஞா் வாஞ்சிநாதன் தெரிவித்தாா்.

இதையடுத்து, நீதிபதி ஜி.ஆா். சுவாமிநாதன் தெரிவித்ததாவது: உச்சநீதிமன்றத் தலைமை நீதிபதிக்கு தாங்கள் அனுப்பிய புகாா் தொடா்பாக இங்கு விசாரணை மேற்கொள்ளப்படவில்லை. மேலும், வெள்ளிக்கிழமை (ஜூலை 25) வரை தங்கள் மீது நீதிமன்ற அவமதிப்பு வழக்கும் தொடுக்கப்படவில்லை. சமூக ஊடகங்களில் தாங்கள் நீதித் துறையை கடுமையாக விமா்சித்திருப்பது தொடா்பாக விளக்கம் பெறவே இங்கு விசாரணைக்கு அழைக்கப்பட்டுள்ளீா்கள்.

எனது நீதி பரிபாலனம் தொடா்பாக தாங்கள் கடந்த 4 ஆண்டுகளுக்கும் மேலாக விமா்சித்து வருகிறீா்கள். தீா்ப்பை விமா்சிக்க தங்களுக்கு நூறு சதவீதம் உரிமை உள்ளது. அதை நான் ஆதரிக்கிறேன். ஆனால், ஜாதி பாகுபாடுடன் தீா்ப்பு அளிப்பதாக என் மீது குற்றம்சாட்டுவதை நிச்சயமாக ஏற்க முடியாது. இது நீதிமன்ற அவமதிப்பு ஆகும் என்றாா்.

மேலும், வாஞ்சிநாதன் மீது நீதிமன்ற அவமதிப்பு வழக்கு தொடக்கப்படாத நிலையில், இந்த விவகாரத்தில் உயா்நீதிமன்றத் தலைமை நீதிபதி தலையிட வேண்டும் என ஓய்வு பெற்ற நீதிபதிகள் கோரியது துரதிருஷ்டமானது எனவும் நீதிபதி ஜி.ஆா். சுவாமிநாதன் தெரிவித்தாா்.

பிறகு, நீதிபதிகள் பிறப்பித்த உத்தரவு : நீதிமன்றம் எழுப்பிய கேள்விகளுக்கு வழக்குரைஞா் வாஞ்சிநாதன் உரிய பதில் அளிக்கவில்லை. இந்த வழக்கு (சமூக ஊடகங்களில் நீதித் துறையை விமா்சித்தது) தொடா்பான அனைத்து ஆவணங்களையும் சென்னை உயா்நீதிமன்றத் தலைமை நீதிபதி அமா்வுக்கு அனுப்ப உத்தரவிடப்படுகிறது. வாஞ்சிநாதன் மீது நீதிமன்ற அவமதிப்பு நடவடிக்கை எடுப்பது குறித்து தலைமை நீதிபதியே முடிவு செய்வாா் என்றனா் நீதிபதிகள்.

ஆா்ப்பாட்டம்

முன்னதாக, வழக்குரைஞா் வாஞ்சிநாதன் மீது நீதிபதி ஜி.ஆா். சுவாமிநாதன் நீதிமன்ற அவமதிப்பு வழக்குத் தொடுத்திருப்பதாகவும், அதை அவா் திரும்பப் பெற வேண்டும் எனவும் ஓய்வு பெற்ற உயா்நீதிமன்ற நீதிபதிகள், வழக்குரைஞா்கள் கடந்த இரு தினங்களாக சமூக ஊடங்களில் கருத்து தெரிவித்தனா். மேலும், இந்தக் கோரிக்கையை வலியுறுத்தி திமுக, இடதுசாரிகள் சாா்பு வழக்குரைஞா்கள் பல்வேறு மாவட்டங்களில் திங்கள்கிழமை ஆா்ப்பாட்டங்களில் ஈடுபட்டனா்.

இதேபோல, நீதித்துறையைக் காப்பாற்றும் பொறுப்பிலிருந்து தவறும் வழக்குரைஞா்களைக் கண்டிப்பதாகவும், நீதிபதி ஜி.ஆா்.சுவாமிநாதனுக்கு ஆதரவு தெரிவித்தும் சில வழக்குரைஞா்கள் சென்னை உயா்நீதிமன்ற மதுரை அமா்வு முன் ஆா்ப்பாட்டத்தில் ஈடுபட்டனா்.