ஊத்தங்கரை அருகே வீட்டின் பூட்டை உடைத்து 20 பவுன் நகை திருட்டு

ஊத்தங்கரை அருகே வீட்டின் பூட்டை உடைத்து 20 பவுன் நகைகளை திருடிச் சென்றவா்களை போலீஸாா் தேடி வருகின்றனா்.

ஊத்தங்கரையை அடுத்த பாண்டவா் நகரை சோ்ந்த ரகு (35), அவரது மனைவி ஆகிய இருவரும் தனியாா் பள்ளியில் ஆசிரியராக பணிபுரிந்து வருகின்றனா். இவரது தந்தை சின்னசாமி (62), தாய் ஆகிய இருவரும் வீட்டில் உள்ளனா்.

வெள்ளிக்கிழமை வீட்டில் தனியாக இருந்த சின்னசாமி மாலை வீட்டை பூட்டிவிட்டு அருகே உள்ள டீ கடைக்கு சென்றாா். பிறகு 4 மணிக்கு வீட்டிற்கு வந்து பாா்த்தபோது வீட்டின் பூட்டு உடைக்கப்பட்டு பீரோவில் இருந்த 20 பவுன் நகைகளை மா்ம நபா்கள் திருடிச் சென்றது தெரியவந்தது.

தகவலறிந்து அங்கு சென்ற ஊத்தங்கரை காவல் துணை கண்காணிப்பாளா் சீனிவாசன், காவல் ஆய்வாளா் முருகன், உதவி ஆய்வாளா் ஜெய்கணேஷ் உள்ளிட்டோா் பல்வேறு தடயங்களைச் சேகரித்து விசாரித்து வருகின்றனா்.