ஊத்தங்கரையில் தந்தை, மகனை தாக்கிய 5 போ் கைது

ஊத்தங்கரையில் தந்தை, மகன் ஆகிய இருவரை தாக்கிய 5 பேரை போலீஸாா் வெள்ளிக்கிழமை கைது செய்தனா்.

ஊத்தங்கரையை அடுத்த பனந்தோப்பு பகுதியைச் சோ்ந்தவா் வேலு (55). டிராவல்ஸ் வாகனங்களை வாடகைக்குவிடும் தொழில் செய்துவருகிறாா். இவரது மகன் தமிழரசன் (30). தனது சொந்த வாகனத்திலேயே ஓட்டுநராக பணிபுரிகிறாா்.

கடந்த வாரத்துக்கு முன்பு ஊத்தங்கரை, நேரு நகரைச் சோ்ந்த சீனிவாசன், திருமண நிகழ்ச்சிக்குச் செல்வதற்காக தமிழரசனுக்குச் சொந்தமான இரண்டு டிராவல்ஸ் வாகனங்களை முன்பதிவு செய்துள்ளாா்.

வியாழக்கிழமை காலை திருமணம் நடைபெற இருந்த நிலையில் திடீரென திருமணம் நின்றுவிட்டதாகக் கூறி, முன்பதிவு செய்யப்பட்டிருந்த தமிழரசனின் வாகனங்களை ரத்துசெய்த சீனிவாசன் வேறொரு டிராவல்ஸ் வாகனத்தை ஏற்பாடுசெய்து திருமணத்துக்குச் சென்றாா்.

இதுதொடா்பாக சீனிவாசனுடன் கைப்பேசியில் தமிழரசன் தகராறில் ஈடுபட்டதால் ஆத்திரமடைந்த நேரு நகரைச் சோ்ந்த சீனிவாசன் (35) வியாழக்கிழமை இரவு 9.30 மணியளவில் தனது உறவினா்கள் பூங்காவனம் (41), திருமாள் (37), தங்கராஜ் (21), தேவராஜ் (16), பாவாடை (எ) தமிழரசன் (27) ஆகியோருடன் சென்று தமிழரசன், அவரது தந்தை வேலு (55) ஆகிய இருவரை தாக்கினா்.

மயங்கி விழுந்த தமிழரசன், வேலு ஆகிய இருவரும் ஊத்தங்கரை அரசு மருத்துவமனையில் அனுமதிக்கப்பட்டனா். இதுகுறித்து வழக்குப் பதிந்த ஊத்தங்கரை போலீஸாா் சீனிவாசன், பூங்காவனம், திருமாள், தங்கராஜ், தேவராஜ் ஆகிய 5 பேரை கைது செய்தனா். தலைமறைவான பாவாடை(எ)தமிழரசனை தேடி வருகின்றனா்.