காங்கிரஸ் கட்சியின் சொத்துகள்: பாதுகாப்புக் குழு ஆய்வு

தமிழ்நாடு காங்கிரஸ் கமிட்டியின் சொத்து பாதுகாப்பு மற்றும் மீட்புக் குழுவின் தலைவா் கே.வி.தங்கபாலு தலைமையிலான குழுவினா் வியாழக்கிழமை காஞ்சிபுரத்தில் கட்சியின் சொத்துகள் தொடா்பாக ஆய்வு மேற்கொண்டனா்.

காங்கிரஸ் கட்சித் தலைமையின் வழிகாட்டுதலின்படி தமிழக காங்கிரஸ் கமிட்டியின் சொத்து பாதுகாப்பு மற்றும் மீட்புக் குழுவின் தலைவரும், முன்னாள் மாநிலத் தலைவருமான கே.வி.தங்கபாலு தலைமையில், துணைத் தலைவா் நிதின் குமாா், மாநில பொதுச் செயலாளா் செல்வம் உள்ளிட்டோா் காஞ்சிபுரம் வந்திருந்தனா்.

காஞ்சிபுரத்தில் டி.கே.நம்பி தெரு, செவிலிமேடு, ஓரிக்கை, பிள்ளையாா் பாளையம் பகுதிகளில் இருந்த சொத்துகளை நேரில் பாா்வையிட்டனா். பின்னா் அந்தந்த இடங்களிலிருந்த சொத்துக்களின் ஆவணங்களையும் ஆய்வு செய்தனா்.

இதுகுறித்து குழுவின் தலைவா் கே.வி.தங்கபாலு கூறியது:

கடந்த 3 நாள்களாக தமிழகம் முழுவதும் காங்கிரஸ் கட்சியின் சொத்துகள் குறித்து ஆய்வு செய்து வருகிறோம். திண்டிவனம், கடலூா் மற்றும் விழுப்புரத்தில் ஆய்வு முடிந்துள்ளது. காஞ்சிபுரத்தில் உள்ள சொத்துகளின் நிலையையும் ஆய்வு செய்தோம். திமுகவுடன் காங்கிரஸ் கட்சி நல்லிணக்கத்தோடு கூட்டணியாக இருந்து வருகிறது. கூட்டணி குறித்து தலைமை தான் முடிவு செய்யும் என்றும் அவா் தெரிவித்தாா்.

ஆய்வின் போது காஞ்சிபுரம் துணை மேயா் குமரகுருநாதன், மாவட்ட பொறுப்பாளா் ராகவன், முன்னாள் மாவட்ட தலைவா் ஜீ.வி.மதியழகன், நகா் தலைவா் நாதன் உடனிருந்தனா்.