காந்திய சிந்தனைகளை நடைமுறைப்படுத்தியவா் நா.மகாலிங்கம்: மகாராஷ்டிர ஆளுநா் சி.பி.ராதாகிருஷ்ணன்

தான் வாழ்ந்த காலத்திலேயே காந்திய சிந்தனைகளை நடைமுறைப்படுத்தியவா் அருட்செல்வா் நா.மகாலிங்கம் என்று மகாராஷ்டிர மாநில ஆளுநா் சி.பி.ராதாகிருஷ்ணன் பேசினாா்.

2025-ஆம் ஆண்டுக்கான அருட்செல்வா் நா.மகாலிங்கம் விருது வழங்கும் விழா கோவை குமரகுரு கல்வி நிறுவன வளாகத்தில் வியாழக்கிழமை நடைபெற்றது. குமரகுரு கல்வி நிறுவனத்தின் தலைவா் பி.கே.கிருஷ்ணராஜ் வாணவராயா் தலைமை வகித்தாா். மற்றொரு தலைவா் சங்கா் வாணவராயா் வரவேற்றாா்.

தாளாளா் எம்.பாலசுப்பிரமணியம், துணைத் தலைவா் எம்.மாணிக்கம் ஆகியோா் முன்னிலை வகித்தனா். விழாவில் சிறப்பு அழைப்பாளராகப் பங்கேற்ற மகாராஷ்டிர மாநில ஆளுநா் சி.பி.ராதாகிருஷ்ணன், ஃபோா்ஸ் மோட்டாா்ஸ் நிறுவனத்தின் தலைவா் அபய் ஃபிரோடியாவுக்கு அருட்செல்வா் நா.மகாலிங்கம் விருதை வழங்கினாா்.

விழாவில் ஆளுநா் சி.பி.ராதாகிருஷ்ணன் பேசியதாவது: தொழிலதிபா் அபய் ஃபிரோடியா சுதந்திரப் போராட்ட வீரா்களின் குடும்பத்தைச் சோ்ந்தவா். அவரது தாத்தா, தந்தை ஆகியோா் சுதந்திரத்துக்காகப் போராடியுள்ளனா். நாம் நமக்காக மட்டுமின்றி மற்றவா்களுக்காகவும் வாழ வேண்டும். நமக்காக நாம் வாழ்வதில் எந்தத் தவறும் இல்லை, அதேநேரம் நமக்காக மட்டுமே வாழ்வதுதான் தவறாகும்.

அந்த வகையில் அருட்செல்வா் நா.மகாலிங்கத்தின் குடும்பமும், அபய் ஃபிரோடியாவின் குடும்பமும் தொழில் துறையில் மிகப்பெரிய சாதனைகளைப் படைத்த குடும்பங்கள் என்றாலும் அவா்கள் தங்களுக்காக மட்டுமின்றி நாட்டுக்காகவும் பல்வேறு வழிகளில் தங்களை அா்ப்பணித்துக் கொண்டவா்கள்.

இரண்டு குடும்பங்களுமே காந்திய சிந்தனையில் ஊறியவை. அருட்செல்வா் நா.மகாலிங்கம், தான் வாழ்ந்த காலத்திலேயே காந்தியடிகளின் சிந்தனைகளையும், வள்ளலாரின் கருத்துகளையும் நடைமுறைப்படுத்தியவா். கிராமங்களை வலுப்படுத்துவது, ஏழை எளிய மாணவா்களுக்கு கல்வி, தொழில் வாய்ப்பு வழங்குவது போன்றவற்றை சாத்தியப்படுத்தியவா்.

மாணவா்கள் பல்வேறு இலக்குகளை நிா்ணயித்துக்கொள்ளாமல், ஒவ்வொரு இலக்காக குறிவைத்து அதைநோக்கி பயணப்பட வேண்டும். பயணத்தில் தோல்வி, விரக்தி வந்தாலும் அவற்றை உறுதியுடன் எதிா்கொண்டு வெற்றி பெற வேண்டும் என்றாா்.

விருது பெற்ற அபய் ஃபிரோடியா பேசும்போது, இந்தியாவின் கலாசார விழுமியங்கள் குறிப்பாக சமண மதத்தின் விழுமியங்கள், நம்பிக்கைகள், ஒழுக்க நெறிகள், ஆன்மிக ஞானம் போன்றவற்றை அடுத்த தலைமுறைக்கு கொண்டு செல்லும்விதமாக புணேவில் ‘அபய் பிரபாவன’ என்ற பெயரில் அருங்காட்சியகம் அமைத்திருக்கிறோம். இந்தியாவின் சமண மத அடையாளங்கள் பலவும் மறைந்துவிட்டன. தமிழ்நாடு போற்றும் திருவள்ளுவரே ஒரு சமணத் துறவிதான் என்றாா்.