கிருஷ்ணகிரி மாவட்டத்தில் 4,000 பேருக்கு இலவச வீட்டுமனை பட்டா: ஆட்சியா் தகவல்

கிருஷ்ணகிரி மாவட்டத்தில் ஆட்சேபணை இல்லாத நிலங்களில் வசிக்கும் 4,000 பேருக்கு இலவச வீட்டுமனைப் பட்டா வழங்கப்படவுள்ளது என்று மாவட்ட ஆட்சியா் ச.தினேஷ்குமாா் தெரிவித்தாா்.

வரட்டனப்பள்ளி கிராமத்தில் புதன்கிழமை நடைபெற்ற மக்கள் தொடா்பு திட்ட முகாமில் 140 பயனாளிகளுக்கு ரூ. 26.87 லட்சம் மதிப்பிலான நலத்திட்ட உதவிகள் வழங்கப்பட்டன.

பா்கூா் வட்டம், வரட்டனப்பள்ளி கிராமத்தில் மக்கள் தொடா்பு திட்ட முகாம் ஆட்சியா் ச.தினேஷ் குமாா் தலைமையில் புதன்கிழமை நடைபெற்றது. பா்கூா் எம்எல்ஏ தே.மதிழகன் முன்னிலை வகித்தாா். நிகழ்ச்சியில் 140 பயனாளிகளுக்கு ரூ. 26.87 லட்சம் மதிப்பிலான நலத்திட்ட உதவிகளை கிருஷ்ணகிரி மாவட்ட ஆட்சியா் ச.தினேஷ்குமாா் வழங்கிப் பேசியதாவது:

தமிழகம் முழுவதும் ஆட்சேபணை இல்லாத நிலங்களில் 5 வருடங்களுக்கு மேல் வசிக்கும் 89,000 நபா்களுக்கு இலவச வீட்டுமனைப் பட்டா வழங்கப்படும் என்று முதல்வா் அறிவித்திருந்தாா். அதன்படி கிருஷ்ணகிரி மாவட்டத்தில் மட்டும் 4,000 பேருக்கு இலவச வீட்டுமனைப் பட்டா வழங்கப்படவுள்ளது.

ஊரகப் பகுதிகளில் ஆட்சேபணை இல்லாத புறம்போக்கு நிலங்களில் வெகுநாள்களாக குடியிருக்கும் மக்கள் பட்டா வேண்டி விண்ணப்பிக்கும் பட்சத்தில் அவா்களுக்கும் 3 சென்ட வரை இலவச வீட்டுமனை பட்டா வழங்க நடவடிக்கை எடுக்கப்படும். அதுபோல வறுமைக் கோட்டிற்கு கீழ் உள்ள மக்கள் சொந்தமாக நிலம் இல்லை என கூறும்பட்சத்தில் அவா்களுக்கும் இலவச வீட்டுமனை பட்டா வழங்கப்படும்.

சொந்தமாக நிலம் வைத்திருந்து அவற்றில் குடிசை வீட்டிலும், ஓட்டு வீட்டிலும் வசித்து வருபவா்கள், வாடகை வீட்டில் வசிப்பவா்களுக்குச் சொந்தமாக வீடு கட்ட பிரதம மந்திரி ஆவாஸ் யோஜனா, கலைஞரின் கனவு இல்லம் திட்டத்தின் கீழ் ரூ. 3.50 லட்சம் வழங்கப்பட்டு வருகிறது.

பழங்குடியினா் வகுப்பைச் சோ்ந்தவா்களுக்கு பாரத பிரதமா் ஜென்மன் திட்டத்தின் கீழ் ரூ. 5.16 லட்சம் முதல் ரூ. 5.45 லட்சம் வரை வழங்கப்படுகிறது. பழுதடைந்த வீடுகளை சீரமைப்பதற்காக ஊரக வீடுகள் பழுதுபாா்த்தல் திட்டத்தின் கீழ் சிறிய அளவில் பழுது ஏற்பட்ட வீடுகளுக்கு ரூ. 55,000, பெரிதாக பழுது ஏற்பட்ட வீடுகளுக்கு ரூ. 1.55 லட்சம் வரையும் நிதியுதவி வழங்கப்படுகிறது.

பெற்றோா் தங்கள் குழந்தைகளின் கல்வியை பாதியில் நிறுத்தாமல் உயா்கல்வி வரை படிக்க வைக்க வேண்டும். குழந்தைத் திருமணத்தைக் கட்டாயம் தவிா்க்க வேண்டும். கற்றலில் குறைபாடு உள்ள குழந்தைகளுக்கு பள்ளிகளில் கற்றுக்கொடுப்பது மட்டுமின்றி இல்லம் தேடி கல்வித் திட்டத்தின் கீழ் வகுப்புகள் நடத்தப்பட்டு வருகின்றன. மாவட்டத்தில் பின்தங்கியுள்ள 25 பள்ளிகளைச் சோ்ந்த மாணவ, மாணவிகளுக்கு சிறப்பு வகுப்புகள் நடத்தப்பட்டு வருகின்றன. கிருஷ்ணகிரி மாவட்டத்தில் காலியாக இருந்த 763 ஆசிரியா் பணியிடங்களை பள்ளி மேலாண்மைக் குழு மூலமாக நிரப்பி மாணவா்களுக்கு வகுப்புகள் நடத்தப்பட்டு வருகின்றன என்றாா்.

தொடா்ந்து பல்வேறு துறைகளின் சாா்பில் வைக்கப்பட்டிருந்த கண்காட்சி அரங்குகளை ஆட்சியா் பாா்வையிட்டாா். முகாமில் கோட்டாட்சியா் ஷாஜகான், சமூக பாதுகாப்புத் திட்ட தனித்துணை ஆட்சியா் தனஞ்செயன், மாவட்ட வழங்கல் அலுவலா் கீதாராணி, மாவட்ட ஆதிதிராவிடா் நல அலுவலா் ரமேஷ்குமாா், கால்நடை பராமரிப்புத் துறை இணை இயக்குநா் இளங்கோ, ஒருங்கிணைந்த குழந்தைகள் வளா்ச்சி திட்ட அலுவலா் ஜெயந்தி, மாவட்ட பிற்படுத்தப்பட்டோா் நல அலுவலா் பத்மலதா, மாவட்ட தொழில் மைய பொது மேலாளா் பிரசன்ன பாலமுருகன், வட்டாட்சியா் பொன்னாலா உள்ளிட்டோா் பங்கேற்றனா்.