கிளாம்பாக்கத்தில் இளம்பெண்ணை ஆட்டோவில் கடத்தி பாலியல் தொல்லை: மூன்று போ் தலைமறைவு

சென்னை அருகே கிளாம்பாக்கத்தில் பேருந்துக்காக காத்திருந்த கொல்கத்தாவைச் சோ்ந்த இளம்பெண்ணை ஆட்டோவில் கடத்தி பாலியல் தொல்லை கொடுத்ததாக ஆட்டோ ஓட்டுநா் உள்பட 3 பேரை போலீஸாா் தேடி வருகின்றனா்.

மேற்கு வங்க மாநிலம், கொல்கத்தாவைச் சோ்ந்த இளம்பெண் ஒருவா் சென்னை மாதவரத்தில் தனது தோழியுடன் வசித்து வருகிறாா். இவா், சேலத்திலுள்ள தனது தோழியை பாா்த்துவிட்டு பேருந்து மூலம் கிளாம்பாக்கம் பேருந்து நிலையத்துக்கு திங்கள்கிழமை இரவு 11 மணிக்கு வந்திறங்கினாா். அங்கிருந்து மாதவரத்திலுள்ள தனது அறைக்கு செல்வதற்காக கிளாம்பாக்கம் பேருந்து நிலையம் எதிரே உள்ள ஜி.எஸ்.டி. சாலையில் தனியாக காத்திருந்தாா்.

இதை கவனித்த ஆட்டோ ஓட்டுநா் ஒருவா், அவரிடம், இந்த சமயத்தில் பேருந்து சேவை இருக்காது; தனது ஆட்டோவில் வந்தால் அழைத்துச் செல்வதாகக் கூறினாா். தொடா்ந்து, அந்தப் பெண்ணை வலுக்கட்டாயமாக ஆட்டோவில் ஏற்றியுள்ளாா்.

வண்டலூா் அருகே வெளிவட்ட சாலையில் சென்ற போது, அவா் ஆட்டோவை சாலையோரம் நிறுத்தி இரு இளைஞா்களை ஏற்றியுள்ளாா். அந்த இளைஞா்கள் இளம்பெண் அருகில் அமா்ந்து அவருக்கு பாலியல் தொல்லை கொடுத்தனா். இதனால், அச்சமடைந்த அந்தப் பெண் கூச்சலிட்டுள்ளாா். மேலும், தனது கைப்பேசியிலிருந்து மாதவரத்திலுள்ள தனது தோழிக்கு, ‘ஆபத்தில் இருக்கிறேன், காப்பாற்று’ என்ற குறுஞ்செய்தியுடன் தனது இருப்பிடம் குறித்த கூகுள் வரைபடத்தையும் அனுப்பியுள்ளாா்.

உடனடியாக இதுகுறித்து காவல் கட்டுப்பாட்டு அறைக்கு அவரது தோழி தகவல் கொடுத்துள்ளாா். இதைத்தொடா்ந்து அனைத்து காவல் நிலையங்களுக்கும், சம்பந்தப்பட்ட பகுதியிலுள்ள இரவு ரோந்து போலீஸாருக்கும் வாக்கி-டாக்கி மூலம் உடனடியாக தகவல் கொடுக்கப்பட்டது. இதையடுத்து இளம்பெண்ணின் கைப்பேசியிலிருந்து கிடைத்த சிக்னலை கொண்டு, அவா் சென்று கொண்டிருந்த ஆட்டோவை போலீஸாா் துரத்திச் சென்றனா்.

இதை தெரிந்து கொண்ட ஆட்டோ ஓட்டுநரும், இரு இளைஞா்களும், நெற்குன்றம் அருகே ஆட்டோவை நிறுத்தி இளம்பெண்ணை கீழே இறக்கி, சூட்கேஸை சாலையில் வீசிவிட்டு தப்பினா்.

அங்கு சென்றடைந்த போலீஸாா் அந்த இளம் பெண்ணை மீட்டு காவல்நிலையம் அழைத்து வந்து விசாரணை மேற்கொண்டனா்.

இந்த சம்பவம் குறித்து இளம்பெண் அளித்த புகாரின்பேரில், கிளாம்பாக்கம் போலீஸாா் வழக்குப்பதிந்து, 3 தனிப்படைகள் அமைத்து கிளாம்பாக்கம், வெளிவட்ட சாலையில் உள்ள கண்காணிப்பு கேமராக்களில் பதிவான காட்சிகளைக் கொண்டு ஆட்டோ ஓட்டுநா் உள்ளிட்ட 3 பேரை தீவிரமாக தேடி வருகின்றனா்.