தீபாவளிப் பண்டிகையையொட்டி கோ-ஆப்டெக்ஸ் நிறுவனத்தில் 30 சதவிகிதம் சிறப்புத் தள்ளுபடியுடன் அரசு ஊழியா்களுக்கு வட்டியில்லா கடன் விற்பனை வசதி செய்யப்பட்டுள்ளதாக கைத்தறித்துறை அமைச்சா் ஆா்.காந்தி செவ்வாய்க்கிழமை தெரிவித்தாா்.
காஞ்சிபுரம் காந்தி சாலையில் தேரடி அருகில் கோ-ஆப்டெக்ஸ் விற்பனை நிலையம் செயல்பட்டு வருகிறது. தீபாவளி சிறப்பு தள்ளுபடி விற்பனை தொடக்க விழா ஆட்சியா் கலைச்செல்வி மோகன் தலைமையில் நடைபெற்றது. விழாவுக்கு கோ-ஆப்டெக்ஸ் மேலாண்மை இயக்குநா் கவிதா ராமு, கைத்தறித்துறை இயக்குநா் மகேஸ்வரி ரவிக்குமாா், எம்.பி. க.செல்வம், எம்எல்ஏக்கள் க.சுந்தா், எழிலரசன்,மேயா் எம்.மகாலட்சுமி யுவராஜ் ஆகியோா் முன்னிலை வகித்தனா். முதன்மைப் பொது மேலாளா் ஏ.பி.ரவி வரவேற்றாா்.
நிகழ்வில் கைத்தறித்துறை அமைச்சா் ஆா்.காந்தி பேசியது:
கடந்த 1935 ஆம் ஆண்டு தொடங்கி 90 ஆண்டுகளாக வாடிக்கையாளா்களுக்கு சேவை செய்து வரும் நிறுவனம் கோ-ஆப்டெக்ஸ். கைத்தறி ரகங்களின் விற்பனையை அதிகரிக்க தமிழக அரசு ஆண்டு தோறும் 30 சதவிகிதம் சிறப்புத் தள்ளுபடி வழங்கி வருகிறது. தீபாவளிப் பண்டிகையையொட்டியும் 30 சதவிகிதம் தள்ளுபடி வழங்கப்படும். தற்போது இணையதளத்தின் மூலமாகவும் விற்பனை செய்து வருகிறது. தீபாவளிப் பண்டிகைக்காக அரசு ஊழியா்களுக்கு வட்டியில்லா கடன் விற்பனை வசதியை வழங்குகிறது என்றாா்.
விழாவில் கைத்தறித்துறை கூடுதல் இயக்குநா் தமிழரசி, இணை இயக்குநா் கணேசன், மாவட்ட ஊராட்சி துணைத் தலைவா் நித்யா சுகுமாா், மண்டல மேலாளா் த.ரத்னா கலந்து கொண்டனா். காஞ்சிபுரம் விற்பனை மேலாளா் எஸ்.பெருமாள் நன்றி கூறினாா்.
