கோவையில் நிலப் பறவைகள் கணக்கெடுப்பு: 232 வகைகளில் 9,033 பறவைகள் உள்ளதாக தகவல்

கோவையில் நிலப் பறவைகள் குறித்து நடத்தப்பட்ட கணக்கெடுப்பில் 232 வகைகளில் 9,033 பறவைகள் இருப்பதாகக் கண்டறியப்பட்டுள்ளது.

வனத் துறை சாா்பில் தமிழகம் முழுதும் ஈர நிலப் பறவைகள் கணக்கெடுப்பு மற்றும் நிலப் பறவைகள் கணக்கெடுப்பு இரண்டு கட்டங்களாக நடைபெற்றது.

இதில், கோவை மாவட்டத்தில் ஆனைமலை புலிகள் காப்பக கள இயக்குநா் வெங்கடேஷ், மாவட்ட வன அலுவலா் ஜெயராஜ் ஆகியோரின் வழிகாட்டுதலில் கோவை நேச்சா் சொசைட்டி நிா்வாகி செல்வராஜ், தமிழ்நாடு இயற்கை மற்றும் பட்டாம்பூச்சி சங்கத்தின் நிா்வாகி பாவேந்தன், இயற்கை வன நிதியம் அமைப்பைச் சோ்ந்த பூமிநாதன் உள்ளிட்ட தன்னாா்வ அமைப்புகள் மூலம் பறவைகள் கணக்கெடுப்பு நடத்தப்பட்டது.

ஆனைமலை புலிகள் காப்பகம் கோவை வனக் கோட்டத்தில் ஈர நிலப் பறவைகள் கணக்கெடுப்பு மாா்ச் 8, 9 -ஆம் தேதிகளில் 25 ஈர நிலங்களில் நடைபெற்றது. இதில், கோவை வனக் கோட்டத்தில் 182 வகை ஈர நிலைப் பறவைகள் கண்டறியப்பட்டன.

இதன் தொடா்ச்சியாக நிலப் பறவைகள் கணக்கெடுப்பு மாா்ச் 15, 16-ஆம் தேதிகளில் 25 இடங்களில் நடைபெற்றது. இதில், 232 வகையான 9,033 பறவைகள் இருப்பதாக கண்டறியப்பட்டது.

இவற்றில் அதிகபட்சமாக கூத்தமண்டி, காந்தவயலில் தலா 763, கோவை குற்றாலத்தில் 724, பனப்பள்ளி மற்றும் கொண்டனூரில் 643 பறவைகள் பதிவு செய்யப்பட்டன.

அதேபோல, ஊரகப் பகுதியில் தாளியூரில் 46 வகையும், நகரப் பகுதியில் ஐ.ஓ.பி. காலனியில் 64 வகையான பறவைகளும் பதிவு செய்யப்பட்டன.

இவற்றோடு 10 வகை இரவாடி பறவைகளும் பதிவு செய்யப்பட்டன. இதில், 232 வகை பறவை இனங்களில் 207 நிலப் பறவைகளும், 25 வகை நீா்வாழ் பறவைகளும் அடங்கும். மொத்தம் பதிவான 9033 பறவைகளில் 8,478 நிலப் பறவைகளும், 555 நீா்வாழ் பறவைகளும் அடங்கும்.

அதேபோல வலசைப் பறவைகளைப் பொறுத்தவரை 41 வகை பதிவு செய்யப்பட்டன. அவற்றில் 3 நீா்வாழ் பறவை இனங்கள் ஆகும். வலசை பறவைகளில் 555 பறவைகள் கணக்கெடுப்பில் பதிவு செய்யப்பட்டன.

இதில், மலபாா் கருப்பு வெள்ளை இருவாச்சி, பெரிய அலகு மீன் கொத்தி, சிறு ஆந்தை, பெரிய பச்சைப்புறா உள்ளிட்ட பறவைகளும் பதிவு செய்யப்பட்டுள்ளன.