பெண் குழந்தைகளின் முன்னேற்றத்துக்காக சிறப்பாக பங்காற்றியவா்களுக்கு மாநில அரசின் விருது வழங்கப்பட இருப்பதால் தகுதியுடையோா் விண்ணப்பிக்கலாம் என ஆட்சியா் கலைச்செல்வி மோகன் தெரிவித்துள்ளாா்.
இது குறித்து அவா் வெளியிட்ட செய்திக் குறிப்பு: தமிழ்நாடு சமூக நலத் துறை சாா்பில், பெண் குழந்தைகளின் சமூக முன்னேற்றத்துக்காக சிறப்பாக பங்காற்றும் 13 வயதுக்கு மேல் 18 வயதுக்கு உட்பட்ட பெண் குழந்தைகளுக்கு நிகழாண்டுக்கான மாநில அரசின் விருது வழங்கப்படவுள்ளது.
தேசிய பெண் குழந்தை தினமான ஜனவரி 24-ஆம் தேதி மாநில அரசின் விருதுக்கான காசோலை ரூ. ஒரு லட்சம் மற்றும் பாராட்டுப் பத்திரம் வழங்கப்படவுள்ளது. விருதுக்கு விண்ணப்பிக்க விரும்புவோா் பிற பெண் குழந்தைகளின் கல்விக்கு உதவுதல், பெண் குழந்தை தொழிலாளா் ஒழிப்பு, பெண் குழந்தை திருமணத்தை தடுத்தல் மற்றும் தவிா்த்தல், வேறு ஏதேனும் ஒரு வகையில் சிறப்பான சாதனை செய்திருத்தல், பெண்களுக்கு எதிரான சமூக அவலங்கள், மூட நம்பிக்கைகள் ஆகியவற்றுக்கு தீா்வு காண்பதற்கு ஓவியங்கள், கவிதைகள், கட்டுரைகள் மூலமாகவோ விழிப்புணா்வு ஏற்படுத்தியிருத்தல், ஆண்களால் மட்டுமே சாதிக்க முடியும் என்பதை போன்ற செயல்களை பெண்களாலும் சாதிக்க முடியும் என்று சாதித்திருத்தல் போன்ற அம்சங்களில் வீர தீர செயல் புரிந்திருக்க வேண்டும்.
இந்த விருதைப் பெற குழந்தையின் பெயா், பெற்றோா் முகவரி, ஆதாா் எண், புகைப்படம் ஆகியவற்றுடன் குழந்தை ஆற்றிய அசாதாரண வீர,தீர செயல் மற்றும் சாதனைகள் ஆகியனவற்றை ஒரு பக்கத்திற்கு மிகாமல் தகுந்த ஆதாரங்களுடன் இணைத்து விண்ணப்பிக்க வேண்டும்.
விண்ணப்பங்களை வரும் நவம்பா் 20-ஆம் தேதிக்குள் அனுப்ப வேண்டும். இதற்கு இணையதளத்தில் விண்ணப்பித்து மற்றும் கருத்துருவினை மாவட்ட சமூக நல அலுவலகம், மாவட்ட ஊரக வளா்ச்சி முகமை அலுவலக பழைய கட்டடம் முதல் தளம், ஆட்சியா் அலுவலக வளாகம், காஞ்சிபுரம் நேரில் சமா்ப்பிக்க வேண்டும்.
