சிஏஜி அறிக்கை: சட்டப் பேரவைத் தலைவா் அலுவலகத்தில் பாஜக எம்எல்ஏக்கள் தா்னா

நிலுவையில் உள்ள 14 சிஏஜி அறிக்கைகளைத் தாக்கல் செய்ய சிறப்புக் கூட்டஅமா்வைக் கூட்டுமாறு வலியுறுத்தி தில்லி சட்டப்பேரவைத் தலைவா் ராம் நிவாஸ் கோயலின் அலுவலகத்தில் பாஜக எம்எல்ஏக்கள் செவ்வாய்க்கிழமை தா்னா போராட்டத்தில் ஈடுபட்டனா்.

அப்போது, எதிா்க்கட்சித் தலைவா் விஜேந்தா் குப்தா தாமதிக்காமல் சிறப்பு அமா்வைக் கூட்டுமாறு வலியுறுத்தி பேரவைத் தலைவரிடம் மகஜா் ஒன்றை அளித்தாா்.

இதுகுறித்து விஜேந்தா் குப்தா மேலும் கூறியதாவது:

தலைமைக் கணக்குத் தணிக்கையாளா் (சிஏஜி) அறிக்கைகளை சட்டப் பேரவையில் தாக்கல் செய்யாமல் இருப்பதன் மூலம் ஆம் ஆத்மி அரசு பொறுப்பற்ற தன்மையைக் காட்டியிருக்கிறது.

2017-18 முதல் 2021-22 ஆம் ஆண்டு வரையிலும் பல்வேறு துறைகளின் தணிக்கை அறிக்கைகளை தில்லி அரசிடம் சிஏஜி சமா்ப்பித்துள்ளாா். இந்த அறிக்கைகள் இரண்டு ஆண்டுகளாக அரசிடம் நிலுவையில் உள்ளன.

அறிக்கைகளை சட்டப் பேரவையில் தாக்கல் செய்யத் தவறுவது சட்டப் பேரவை உறுப்பினா்களின் அரசியலமைப்பு உரிமைகளை மீறுவது மட்டுமல்லாமல், பொது நிதி எவ்வாறு பயன்படுத்தப்படுகிறது என்பதை அறிய குடிமக்களுக்கு உரிமை இருப்பதால், பொதுமக்களின் நம்பிக்கையை குறைமதிப்பிற்கு உள்படுத்துகிறது.

நிலுவையில் உள்ள அறிக்கைகளை தாக்கல் செய்ய அரசுக்கு உத்தரவிடக் கோரி பாஜக சட்டமன்ற உறுப்பினா்களும் தில்லி உயா்நீதிமன்றத்தை அணுகியுள்ளனா்.

இந்த அறிக்கைகள் சட்டப்பேரவை செயலகத்துக்கு அனுப்பப்பட்டதாக அரசு உயா்நீதிமன்றத்தில் டிசம்பா் 24ஆம் தேதி தெரிவித்துள்ளது. அடுத்த விசாரணை ஜனவரி 9ஆம் தேதி நடைபெற உள்ளது என்றாா் குப்தா.

சட்டப் பேரவையின் தற்போதைய ஐந்தாண்டு பதவிக்காலம் முடிவதற்குள் சிஏஜி அறிக்கைகளை தாக்கல் செய்ய வேண்டும் என அரசுக்கு பாஜக அழுத்தம் கொடுத்து வருகிறது. 70 உறுப்பினா்களை கொண்ட சட்டப் பேரவைக்கு பிப்ரவரியில் தோ்தல் நடைபெற உள்ளது குறிப்பிடத்தக்கது.