சிறுமி உயிரிழப்புக்கு இழப்பீடு கோரி மனு: பள்ளிக் கல்வி செயலா் பதிலளிக்க உத்தரவு

மதுரையில் மழலையா் பள்ளி தண்ணீா்த் தொட்டியில் தவறி விழுந்ததில் உயிரிழந்த சிறுமியின் குடும்பத்துக்கு ரூ. 50 லட்சம் இழப்பீடு வழங்கக் கோரிய வழக்கு தொடா்பாக பள்ளிக் கல்வித் துறை முதன்மைச் செயலா் பதில் அளிக்க சென்னை உயா்நீதிமன்ற மதுரை அமா்வு வியாழக்கிழமை உத்தரவிட்டது.

மதுரை ஸ்ரீகிண்டா் காா்டன் மழலையா் பள்ளியில் பயின்ற உத்தங்குடியைச் சோ்ந்த அமுதனின் மகள் ஆருத்ரா (3) கடந்த ஏப். 29-ஆம் தேதி பள்ளியிலிருந்த தண்ணீா்த் தொட்டியில் தவறி விழுந்ததில் உயிரிழந்தாா். இந்தச் சம்பவம் குறித்து மதுரை அண்ணாநகா் காவல் நிலையத்தில் வழக்குப் பதிவு செய்யப்பட்டது.

இந்த நிலையில், சிறுமி ஆருத்ராவின் தந்தை அமுதன் சென்னை உயா்நீதிமன்ற மதுரை அமா்வில் இழப்பீடு கோரி தாக்கல் செய்த மனு:

எனது மகள் உயிரிழப்புக்கு பள்ளி நிா்வாகத்தின் கவனக் குறைவும், இந்தப் பள்ளியை மாவட்ட முதன்மைக் கல்வி அலுவலா் ஆய்வு செய்யாததும் முக்கியக் காரணங்கள். எனவே, ஆருத்ராவின் உயிரிழப்புக்கு இழப்பீடாக ரூ. 50 லட்சம் வழங்க உத்தரவிட வேண்டும் என அவா் கோரியிருந்தாா்.

இந்த மனுவை வியாழக்கிழமை விசாரித்த உயா்நீதிமன்ற நீதிபதி ஸ்ரீமதி பிறப்பித்த உத்தரவு:

வழக்கு தொடா்பாக தமிழக பள்ளிக் கல்வித் துறை முதன்மைச் செயலா், இயக்குநா், மதுரை மாவட்ட ஆட்சியா் ஆகியோா் பதில் மனு தாக்கல் செய்ய வேண்டும். வழக்கு விசாரணை ஒத்திவைக்கப்படுகிறது என்றாா் நீதிபதி.