சிறுமிக்கு பாலியல் தொல்லை: ஆசிரியருக்கு 3 ஆண்டுகள், தொழிலாளிக்கு 10 ஆண்டுகள் சிறை

ஒசூா் அருகே சிறுமிக்கு பாலியல் தொல்லை அளித்த வழக்கில் ஆசிரியருக்கு 3 ஆண்டுகளும், தொழிலாளிக்கு 10 ஆண்டுகளும் சிறைத்தண்டனை விதித்து கிருஷ்ணகிரி மகளிா் நீதிமன்றம் புதன்கிழமை தீா்ப்பளித்தது.

கிருஷ்ணகிரி மாவட்டம், ஒசூரை அடுத்த நல்லூரில் உள்ள ஒரு குழந்தைகள் காப்பகத்தில் ஆசிரியராகப் பணியாற்றிய ஆனந்த் (39) என்பவா், கடந்த 2019 டிச. 4 ஆம் தேதி காப்பகத்தில் குழந்தைகளுக்கு மாலைநேர சிறப்பு வகுப்பு நடத்தியபோது வகுப்பில் இருந்த சிறுமிக்கு பாலியல் தொல்லை அளித்துள்ளாா்.

இதையடுத்து, பாதிக்கப்பட்ட மாணவி அளித்த புகாரின் பேரில், ஒசூா் அனைத்து மகளிா் காவல் நிலைய போலீஸாா் வழக்குப் பதிந்து ஆனந்தை கைது செய்தனா்.

அவரிடம் போலீஸாா் நடத்திய விசாரணையில், பாகலூரைச் சோ்ந்த தொழிலாளி சிவா (28) என்பவரும் அந்தச் சிறுமிக்கு பாலியல் தொல்லை அளித்தது தெரியவந்தது. இதையடுத்து, போலீஸாா் தொழிலாளி சிவாவையும் கைது செய்தனா்.

இந்த வழக்கு விசாரணை கிருஷ்ணகிரி மகளிா் விரைவு நீதிமன்றத்தில் நடைபெற்று வந்தது. விசாரணை முடிவுற்ற நிலையில், நீதிபதி லதா புதன்கிழமை தீா்ப்பளித்தாா். அதில், ஆனந்துக்கு 3 ஆண்டுகள் சிறைத்தண்டனை, ரூ. 1,000 அபராதமும், தொழிலாளி சிவாவுக்கு 10 ஆண்டுகள் சிறைத்தண்டனை, ரூ. 5 ஆயிரம் அபராதமும் விதித்தாா்.