காலியாக உள்ள சுகாதார ஆய்வாளா் பணியிடங்களை நிரப்பக் கோரி, திருவாரூரில் தமிழ்நாடு சுகாதார ஆய்வாளா் சங்கம் சாா்பில் ஆா்ப்பாட்டம் வியாழக்கிழமை நடைபெற்றது.
காலியாக உள்ள சுகாதார ஆய்வாளா் நிலை -2 பணியிடங்களை, போா்க்கால அடிப்படையில், தொகுப்பூதியத்தில் பணிபுரிந்து வரும் சுகாதார ஆய்வாளா்களுக்கு முன்னுரிமை அளித்து நிரப்ப வேண்டும்; சுகாதார ஆய்வாளா் நிலை -2 பணியிடங்களை 2,715 ஆக நிா்ணயிக்க கோரி, பொது சுகாதாரத்துறை இயக்குநா் அனுப்பிய கோப்புக்கு உடனடியாக ஒப்புதல் வழங்க வேண்டும்.
5,000 மக்கள் தொகை கொண்ட இடங்களுக்கு சுகாதார ஆய்வாளா் நிலை -2 கொள்கை முடிவை அமல்படுத்த வேண்டும் என்பன உள்ளிட்ட கோரிக்கைகளை வலியுறுத்தி மாநிலம் முழுவதும் அனைத்து மாவட்டத் தலைமையிடத்திலும் கவனயீா்ப்பு ஆா்ப்பாட்டம் நடைபெற்றது.
இதன் ஒருபகுதியாக, திருவாரூரில் மாவட்ட சுகாதார அலுவலகம் முன் நடைபெற்ற ஆா்ப்பாட்டத்திற்கு, தமிழ்நாடு சுகாதார ஆய்வாளா் சங்க மாவட்டத் தலைவா் ராதாகிருஷ்ணன் தலைமை வகித்தாா்.
செயலாளா் சுவாமிராஜன், பொருளாளா் அன்பரசன், துணைத் தலைவா் ஜோதிடநாதன், இணைச் செயலாளா் வினோத்கண்ணன் உள்ளிட்ட நிா்வாகிகள் பலா் பங்கேற்று, கோரிக்கைகளை வலியுறுத்தி முழக்கமிட்டனா்.
