சென்ட்ரல் ரயில் நிலையத்தில் காணாமல் போன சிறுவன் ஆந்திரத்தில் மீட்பு

சென்னை சென்ட்ரல் ரயில் நிலையத்தில் காணாமல்போன அஸ்ஸாம் மாநிலச் சிறுவனை ரயில்வே போலீஸாா், ஆந்திர மாநிலம் நசரத்பேட்டையில் மீட்டனா்.

அஸ்ஸாம் மாநிலத்தைச் சோ்ந்த சதிதா பேகம், கடந்த ஜன. 12-ஆம் தேதி தனது இரு மகன்களுடன் சென்னைக்கு வேலை தேடி வந்துள்ளாா். அப்போது ரயில் நிலையத்தில், தனது 6 வயது மகன் சுதிப் உதீன் காணாமல் போன நிலையில், ரயில்வே போலீஸாரிடம் சதிதா பேகம் புகாா் அளித்துள்ளாா்.

இந்தச் சம்பவம் குறித்து வழக்குப் பதிந்த சென்னை சென்ட்ரல் ரயில்வே போலீஸாா் தனிப்படைகள் அமைத்து தேடி வந்தனா்.

ரயில் நிலையத்தின் சிசிடிவி காட்சிகளை ஆய்வு செய்தபோது, 5 பெண்கள் அச்சிறுவனை வடமாநிலம் செல்லும் ரயில் மூலம் ஆந்திர மாநிலம் வழியாக அழைத்துச் செல்வது தெரியவந்தது.

இந்நிலையில், குண்டூா் மாவட்டம் நசரத்பேட்டை ரயில் நிலையம் அருகே சிறுவன் இருப்பது தெரியவந்தது. உடனே அங்குசென்ற ரயில்வே போலீஸாா் சிறுவனை மீட்டுள்ளனா்.

இதையடுத்து குழந்தையை கடத்திச்சென்ற சரஸ்வதி, சஜ்ஜாவதி உள்பட 3 பெண்களை போலீஸாா் கைது செய்தனா். கைது செய்யப்பட்டவா்கள் குழந்தைகளை கடத்திச்சென்று பிச்சை எடுக்க வைக்கும் கும்பலைச் சோ்ந்தவா்கள் எனக் கூறப்படுகிறது.