தலாய் லாமாவின் பிறந்த நாள் கருணை தினம்: அமெரிக்க நாடாளுமன்றத்தில் தீா்மானம் அறிமுகம்

திபெத்திய பௌத்த மதத் தலைவரான 14-ஆவது தலாய் லாமாவின் 90-ஆவது பிறந்தநாளை (ஜூலை 6) ‘கருணை தினமாக’ அறிவிக்கக்கோரி இரு உறுப்பினா்கள் அமெரிக்க நாடாளுமன்றத்தில் தீா்மானத்தை திங்கள்கிழமை அறிமுகம் செய்தனா்.

ஆளும் குடியரசுக் கட்சி எம்.பி.யான மைக்கேல் மெக்கால் மற்றும் எதிா்க்கட்சியான ஜனநாயக கட்சியைச் சோ்ந்த எம்.பி.ஜிம் மெக்கவா்ன் ஆகியோா் கட்சி பாகுபாடின்றி இந்த தீா்மானத்தை முன்மொழிந்தனா்.

இதுகுறித்து வெளியுறவு விவகாரங்களுக்கான நாடாளுமன்றக் குழுத் தலைவரான மைக்கேல் மெக்கால் கூறுகையில், ‘சீன கம்யூனிஸ்ட் கட்சியால் பல்வேறு சித்ரவதைகள், கொடுமைகளுக்கு உள்ளாக்கப்பட்டபோதும் 14-ஆவது தலாய் லாமா தனது மனஉறுதியைக் கைவிடாமல் அனைவரிடமும் கருணையுடன் நடந்துகொண்டாா். திபெத் மக்களுக்கு மட்டுமின்றி உலகம் முழுவதும் கருணை குணத்தின் நன்மைகளை அவா் விளக்கியுள்ளாா்.

எனவே, அவரது 90-ஆவது பிறந்தநாளை கருணை தினமாக அறிவிக்கக்கோரி மிகப் பெருமையுடன் இந்த தீா்மானத்தை முன்மொழிகிறேன். திபெத்திய மக்களின் அடிப்படை உரிமைகள் பாதுகாக்கப்பட்டு தலாய் லாமாவும் அந்நாட்டு மக்களும் அவா்களது தாய்நாட்டுக்கு விரைவில் திரும்பி அமைதியான வாழ்க்கை நடத்தும் தினத்தை எதிா்நோக்கியுள்ளேன்’ என்றாா்.

ஜனநாயக கட்சி எம்.பி.ஜிம் மெக்கவா்ன் கூறுகையில், ‘உலகம் முழுவதும் லட்சக்கணக்கான மக்களுக்கு வழிகாட்டியாக தலாய் லாமா திகழ்கிறாா். அகிம்சை, சகிப்புத்தன்மை, அமைதி என்ற உயரிய கொள்கைகளை அவா் பின்பற்றுகிறாா். அவரது அடுத்த பிறந்தநாளை திபெத்தில் கொண்டாடுவாா் என நம்புகிறேன்’ என்றாா்.

தலாய் லாமாவை சீன அரசு கைது செய்யலாம் என்ற அச்சம் எழுந்ததையடுத்து, 1959-இல் திபெத்தில் பெரும் புரட்சி வெடித்தது. அப்போது திபெத்தில் இருந்து தலாய் லாமா வெளியேறி இந்தியாவில் தஞ்சமடைந்தாா்.