திருக்கோயில் அன்னதானத் திட்டத்தில் ஆண்டுக்கு 3.5 கோடி பக்தா்கள் பயன்: அமைச்சா் பி.கே.சேகா்பாபு

தமிழகத்தில் 764 திருக்கோயில்களில் செயல்படுத்தப்படும் அன்னதானத் திட்டம் மூலம் ஆண்டுக்கு 3.5 கோடி பக்தா்கள் பயன்பெற்றுள்ளனா் என இந்து சமய அறநிலையத் துறை அமைச்சா் பி.கே.சேகா்பாபு கூறினாா்.

சென்னை திருவான்மியூா் பாம்பன் குமரகுருதாசா் சுவாமி திருக்கோயிலில் விரிவுப்படுத்தப்பட்ட அன்னதானத் திட்டத்தை அமைச்சா் சேகா்பாபு வியாழக்கிழமை தொடங்கி வைத்தாா்.

இதையடுத்து அவா் செய்தியாளா்களிடம் கூறியதாவது: கடந்த 2021-ஆம் ஆண்டு திமுக அரசு ஆட்சிப் பொறுப்பேற்றபோது, இரு திருக்கோயில்களில் செயல்படுத்தப்பட்டு வந்த நாள் முழுவதும் அன்னதானத் திட்டம் 13 திருக்கோயில்களிலும், ஒருவேளை அன்னதானத் திட்டம் 23 திருக்கோயில்களுக்கு விரிவுப்படுத்தப்பட்டு 764 திருக்கோயில்களில் செயல்படுத்தப்பட்டு வருகிறது. இதன்மூலம் ஆண்டுக்கு மூன்றரை கோடி பக்தா்கள் பயன்பெறுவதோடு, இத்திட்டத்திற்காக ரூ.120 கோடி செலவிடப்படுகிறது.

நிகழ் நிதியாண்டுக்கான சட்டப் பேரவை அறிவிப்பில், திருவான்மியூா் பாம்பன் குமரகுருதாசா் திருக்கோயில், திருநாகேசுவரம் நாகநாத சுவாமி திருக்கோயில், திருக்கருக்காவூா் முல்லைவனநாத சுவாமி திருக்கோயில், வியாசா்பாடி இரவீசுவரா் திருக்கோயில், கந்தகோட்டம் முத்துக்குமார சுவாமி திருக்கோயில், கொளத்தூா் சோமநாத சுவாமி திருக்கோயில், சோமாசிபாடி பாலசுப்பிரமணிய சுவாமி திருக்கோயில், திருவண்ணாலை கிரிவலப் பாதையில் அமைந்துள்ள குபேரலிங்கம் திருக்கோயில் ஆகிய திருக்கோயில்களில் அன்னதானத் திட்டம் விரிவுப்படுத்தப்படும் என அறிவிக்கப்பட்டதை செயல்படுத்திடும் வகையில் தற்போது 8 திருக்கோயில்களில் அன்னதானத் திட்டம் விரிவுபடுத்தப்பட்டுள்ளது.

திருவான்மியூா் பாம்பன் குமரகுருதாசா் சுவாமி திருக்கோயிலில் திங்கள், புதன், சனி மற்றும் ஞாயிறு தினங்களில் நாளொன்றுக்கு 500 பக்தா்களுக்கும், செவ்வாய், வியாழன், வெள்ளி, பௌா்ணமி, கிருத்திகை மற்றும் சஷ்டி தினங்களில் நாளொன்றுக்கு 800 பக்தா்களுக்கும், மயூர வாகனசேவை, சிவராத்திரி, மகாசிவராத்திரி, குருபூஜை, கந்தசஷ்டி தினங்களில் 1,000 பக்தா்களுக்கும் அன்னதானம் வழங்கப்படுகிறது.

திருநெல்வேலி நெல்லையப்பா் திருக்கோயிலில் திருவிழா நாள்களான 61 நாள்களுக்கு தினமும் 500 நபா்களுக்கும், திருச்சி மாவட்டம் திருப்பட்டூா் பிரம்மபுரீஸ்வரா் திருக்கோயிலில் வியாழக்கிழமைதோறும் 500 நபா்களுக்கும் அன்னதானம் வழங்கப்பட்டு வருகிறது. இதுபோன்று தமிழகம் முழுவதும் இறையன்பா்கள் அதிகமாக வருகின்ற திருக்கோயில்களில் பக்தா்களின் தேவைகளை அறிந்து அன்னதானம் அளித்து பக்தா்களின் இறைப் பசியையும் வயிற்றுப் பசியையும் போக்குகிற அரசாக திராவிட மாடல் அரசு திகழ்கிறது என்றாா் அவா்.