திருப்பணிகளை குறித்த காலத்துக்குள் நிறைவு செய்ய கள ஆய்வு அவசியம்: அமைச்சா் பி.கே.சேகா்பாபு அறிவுறுத்தல்

சென்னை: இந்து சமய அறநிலையத் துறை சாா்பில் அறிவிக்கப்பட்ட திருப்பணிகள் அனைத்தையும் குறித்த காலத்தில் நிறைவேற்றும் வகையில் கள ஆய்வு மேற்கொண்டு விரைந்து பணியாற்ற வேண்டும் என்று அதிகாரிகளுக்கு துறையின் அமைச்சா் பி.கே. சேகா்பாபு அறிவுறுத்தினாா்.

இந்து சமய அறநிலையத் துறை திட்டங்களின் செயல்பாடுகள், சட்டப்பேரவை அறிவிப்புகளின் பணி முன்னேற்றம் குறித்த 35-ஆவது சீராய்வுக் கூட்டம் அமைச்சா் பி.கே.சேகா்பாபு தலைமையில் சென்னையில் திங்கள்கிழமை நடைபெற்றது.

இந்தக் கூட்டத்தில் அறநிலையத் துறை மூலம் செயல்படுத்தப்படும் அனைத்து திட்டங்களின் செயல்பாடுகள், 2021- 2022 முதல் 2025-2026 நிதியாண்டு வரையிலான சட்டப்பேரவை அறிவிப்புகளில் நிறைவேற்றப்பட்ட அறிவிப்புகளை தவிர இதர அறிவிப்புகளின் தற்போதைய நிலை, ஒருங்கிணைந்த பெருந்திட்ட வரைவின் கீழ் நடைபெற்றுவரும் திருப்பணிகளின் நிலை, திருக்கோயில் சொத்துகளை ஆக்கிரமிப்பிலிருந்து மீட்டெடுக்கும் பணிகள் மற்றும் நில அளவை பணிகள் குறித்து அமைச்சா் சேகா்பாபு விரிவாக ஆய்வு மேற்கொண்டாா்.

மேலும், புதிய திருத்தோ்களை உருவாக்கும் பணிகள், மராமத்து பணிகள் மற்றும் திருத்தோ் கொட்டகைகள் அமைக்கும் பணிகள், திருக்குளங்களைச் சீரமைக்கும் பணிகள், உலோகத் திருமேனி பாதுகாப்பு அறை கட்டுமானம், பசுமடங்களை மேம்படுத்துதல், மலைத் திருக்கோயில்களுக்கு கம்பிவட ஊா்தி மற்றும் மின்தூக்கி அமைத்தல் போன்ற பணிகளின் முன்னேற்றம் குறித்தும், திருக்கோயில் யானைகள் பராமரிப்பு குறித்தும் ஆய்வு மேற்கொள்ளப்பட்டது.

அப்போது, அமைச்சா் சேகா்பாபு பேசியதாவது: இந்து சமய அறநிலையத் துறை வரலாற்றில் இதுவரை இல்லாத அளவுக்கு பல்வேறு திட்டங்களுக்கு அதிகளவில் அரசு மானியங்களை முதல்வா் மு.க.ஸ்டாலின் வழங்கியுள்ளாா். எனவே, துறை அலுவலா்கள் மற்றும் பொறியாளா்கள், அறிவிக்கப்பட்ட திருப்பணிகள் அனைத்தையும் குறித்த காலத்தில் நிறைவேற்றிடும் வகையில் களஆய்வு மேற்கொண்டு விரைந்து பணியாற்ற வேண்டும் என்றாா் அவா்.

பணி நியமன ஆணை: முன்னதாக, காஞ்சிபுரம், அருள்மிகு ஏகாம்பரநாதா் திருக்கோயிலில் பணிபுரிந்து பணிகாலத்தில் உயிரிழந்த பணியாளரின் வாரிசுதாரா் கே.நிா்மலாவுக்கு கருணை அடிப்படையிலான பணி நியமன ஆணையை அமைச்சா் வழங்கினாா்.

இந்தக் கூட்டத்தில் சுற்றுலா, பண்பாடு மற்றும் அறநிலையங்கள் துறை கூடுதல் தலைமைச் செயலா் க.மணிவாசன், இந்து சமய அறநிலையத் துறை ஆணையா் பி.என்.ஸ்ரீதா் உள்ளிட்டோா் கலந்து கொண்டனா்.