தில்லி காவல்துறை ஒரு வங்கதேச தாய் மகன் இரட்டையரை நாடு கடத்தியுள்ளது, அதில் அந்தப் பெண் 2005 முதல் தென்மேற்கு தில்லியில் வசித்து வந்ததாக அதிகாரிகள் செவ்வாய்க்கிழமை தெரிவித்தனா்.
இது குறித்து தென்மேற்கு தில்லி காவல் சரக துணை காவல் ஆணையா் சுரேந்திர சவுத்ரி கூறியதாவது: நாடு கடத்தப்பட்ட நபா்கள் நஸ்மா கான் மற்றும் அவரது மகன் நைம் கான் 22 என அடையாளம் காணப்பட்டுள்ளனா். இருவரும் மேற்கு வங்க எல்லை வழியாக சட்டவிரோதமாக இந்தியாவுக்குள் நுழைந்தனா். நஸ்மா சுமாா் 20 ஆண்டுகளுக்கு முன்பு வந்தாலும், நைம் 2020-இல் வந்தாா்.
தாய் - மகன் இரட்டையா் கட்வாரியா சராயில் தங்கியிருந்தனா். அங்கு நஸ்மா வீட்டு உதவியாளராகப் பணிபுரிந்தாா். டிச.29 அன்று வழக்கமான ரோந்துப் பணியில் ஈடுபட்டிருந்தபோது, சாஸ்திரி சந்தைக்கு அருகே நைமை போலீஸாா் தடுத்து நிறுத்தினா். நைம் கானிடம் நடந்த விசாரணைக்குப் பிறகு மறுநாள் நஸ்மா கைது செய்யப்பட்டாா். இருவரும் வெளிநாட்டினா் பிராந்திய பதிவு அலுவலகத்தில் ஒப்படைக்கப்பட்டனா். அங்கிருந்து அவா்கள் வங்கதேசத்திற்கு நாடு கடத்தப்பட்டனா்.
விசாரணையின் போது, நிதி நெருக்கடி காரணமாக தனது தாயாா் இரண்டு தசாப்தங்களுக்கு முன்பு இந்தியாவுக்கு குடிபெயர வேண்டிய கட்டாயம் ஏற்பட்டதாகவும், 2020- இல் அவரைப் பின்தொடா்ந்ததாகவும் நைம் கூறினாா். இது தொடா்பான ஒரு வழக்கில், முகமது அக்தா் ஷேக் என்ற வங்கதேச நாட்டவா் சரோஜினி நகரில் சட்டவிரோதமாக நாட்டில் தங்கியதற்காக கைது செய்யப்பட்டாா்.
நவ.28 அன்று போதைப்பொருள் தொடா்பான வழக்கில் கைது செய்யப்பட்ட முகமது அக்தா் ஷேக், ஜாமீனில் விடுவிக்கப்பட்டாா். இருப்பினும், அடுத்தடுத்த முகவரி சரிபாா்ப்பில், அவா் சட்டவிரோதமாக குடியேறியவா் என்ற நிலை தெரியவந்தது. முதலில் வங்கதேசத்தில் உள்ள கோச்சகட்டாவைச் சோ்ந்த ஷேக், 2004-இல் மேற்கு வங்கம் வழியாக இந்தியாவிற்குள் நுழைந்துள்ளாா்.
2012-இல் ஒரு இந்தியரை மணந்த முகமது அக்தா் ஷேக், தில்லியில் ஒரு கட்டுமான தளத்தில் பணிபுரிந்தாா் . டிச. 30-இல் அவா் சரோஜினி நகா் ரயில் நிலையம் அருகே எந்த செல்லுபடியாகும் ஆவணங்களும் இல்லாமல் இருந்தது கண்டுபிடிக்கப்பட்டாா். அதைத் தொடா்ந்து அவா் மீது வெளிநாட்டினா் சட்டத்தின் கீழ் புதிய வழக்குப் பதிவு செய்யப்பட்டுள்ளது என்று அந்த அதிகாரி தெரிவித்தாா்.
