தேசிய நெடுஞ்சாலை பகுதியில் திறந்தவெளி கிணறுகளை மூட வேண்டும்: திருப்பத்தூா் ஆட்சியா் அறிவுறுத்தல்

திருப்பத்தூா் மாவட்டத்தில் தேசிய நெடுஞ்சாலை பகுதியில் உள்ள திறந்தவெளி கிணறுகளை மூட நடவடிக்கை எடுக்க வேண்டும் என அதிகாரிகளுக்கு ஆட்சியா் க.சிவசௌந்திரவல்லி அறிவுறுத்தினாா்.

சட்டம் ஒழுங்கு மற்றும் சாலை பாதுகாப்பு தொடா்பான மாதாந்திர கூட்டம் திருப்பத்தூா் மாவட்ட ஆட்சியா் அலுவலகக் கூட்டரங்கில் நடைபெற்றது.

கூட்டத்துக்கு, எஸ்.பி. வி.சியாமளா தேவி, மாவட்ட வருவாய் அலுவலா் நாராயணன், ஏடிஎஸ்பி கோவிந்தராசு, சமூகப் பாதுகாப்பு திட்ட தனித் துணை ஆட்சியா் பூஷன்குமாா் ஆகியோா் முன்னிலை வகித்தனா்.

கூட்டத்தில் ஆட்சியா் க.சிவசௌந்திரவல்லி தலைமை வகித்துப் பேசியது:புதூா்நாடு அருகே உள்ள நெல்லிவாசல் நாடு, மேலூா் ஆகிய கிராமங்களில் கூடுதலாக பேருந்து இயக்கக் கோரி சாலை மறியல் போராட்டங்கள் நடைபெற்றன. அந்த பகுதிகளுக்கு கூடுதல் பேருந்துகள் இயக்க நடவடிக்கை எடுக்க வேண்டும். திருப்பத்தூா் மாவட்டத்தில் தேசிய நெடுஞ்சாலையோரம் பல இடங்களில் திறந்த வெளி கிணறுகள் உள்ளன. இதனால் விபத்துகள் ஏற்பட வாய்ப்பு உள்ளது. எனவே அவற்றை மூட நடவடிக்கை எடுக்க வேண்டும். ஜோலாா்பேட்டை ரயில் நிலையத்தின் அருகே ஒரு புறம் மட்டுமே பயணிகள் நிழற்கூடம் உள்ளது. மற்றொரு புறம் அளந்து அங்கு ஆக்கிரமிப்புகள் இருந்தால் அகற்றிவிட்டு, புதிதாக பயணிகள் நிழற்கூடம் அமைக்க வேண்டும் என்றாா்.

கூட்டத்தில் பல்வேறு துறை அரசு அதிகாரிகள் கலந்து கொண்டனா்.