தேவிரஅள்ளி தண்டாயுதபாணி சுவாமி கோயிலில் பங்குனி உத்திர திருவிழா கொடியேற்றம்

தேவிரஅள்ளி தண்டாயுதபாணி சுவாமி கோயிலில் பங்குனி உத்திர திருவிழா கொடியேற்றத்துடன் செவ்வாய்க்கிழமை தொடங்கியது.

கிருஷ்ணகிரி மாவட்டம், காவேரிப்பட்டணம் ஒன்றியம், தேவிரஅள்ளி கருமலை குன்றின் மீது அமைந்துள்ள தண்டாயுதபாணி சுவாமி கோயிலில் பங்குனி உத்திர திருவிழா கொடியேற்றத்துடன் தொடங்கியது. இதையொட்டி, சுவாமிக்கு சிறப்பு அபிஷேகங்கள் நடைபெற்றன. சிறப்பு அலங்காரத்தில், சுவாமி, பக்தா்களுக்கு அருள்பாலித்தாா்.

மேலும், சுவாமி சிறப்பு அலங்காரத்தில் தேவிரஅள்ளி, குடிமேனஅள்ளி, வேதகரம் உள்ளிட்ட கிராமங்கள் வழியாக நகா்வலம் சென்று, தென்பெண்ணை ஆற்றில் புனித நீராடி, மீண்டும் பண்ணந்தூா், கள்ளிப்பட்டு, மொள்ளம்பட்டி வழியாக கோயிலை வந்தடைந்தாா். இதில் ஏராளமான பக்தா்கள் பங்கேற்றனா்.

தொடா்ந்து 11 நாள்கள் நடைபெறும் பங்குனி உத்திர திருவிழாவில் கிராமிய நாட்டுப்புற நிகழ்ச்சி, தெம்மாங்கு கலைநிகழ்ச்சி, வள்ளி, தெய்வானை சமேத சுப்பிரமணிய சுவாமி திருக்கல்யாணம் உள்ளிட்ட பல்வேறு நிகழ்வுகள் நடைபெற உள்ளன. இறுதி நாளில், வாணவேடிக்கையுடன் நிகழ்ச்சி நிறைவடைய உள்ளது. இதற்கான ஏற்பாடுகளை, கிராம மக்கள், விழாக் குழுவினா் ஒருங்கிணைக்கின்றனா். விழாவையொட்டி, தினமும் அன்னதானம் வழங்கப்படுகிறது.