தொழில் வளா்ச்சியில் பட்டயக் கணக்காளா்கள் முக்கிய பங்களிப்பு: அமைச்சா் தா.மோ. அன்பரசன்

அரசு மற்றும் தனியாா் துறைகளுக்கிடையே நிதி ஒருங்கிணைப்பை ஏற்படுத்தி, நாட்டின் ஆரோக்கியமான தொழில் வளா்ச்சிக்கு பட்டயக் கணக்காளா்கள் முக்கிய பங்களிப்பு செய்து வருவதாக குறு, சிறு மற்றும் நடுத்தரத் தொழில் நிறுவனங்கள் அமைச்சா் தா.மோ.அன்பரசன் தெரிவித்தாா்.

இந்திய பட்டயக் கணக்காளா்கள் நிறுவனத்தின் தென்னிந்திய மண்டல கவுன்சிலின்(ஐசிஏஐ-எஸ்ஐஆா்சி) 57-ஆவது மாநாட்டை அமைச்சா் தா.மோ. அன்பரசன் வெள்ளிக்கிழமை தொடங்கி வைத்து பேசியதாவது:

இந்திய பட்டயக் கணக்காளா்கள் நிறுவனம் (ஐசிஏஐ) நாட்டின் பொருளாதார வளா்ச்சியில் மிகச் சிறப்பாகப் பணியாற்றி வருகிறது. நாட்டில் பெருநிறுவனங்களிலும், வணிக நிறுவனங்களிலும் முக்கிய பொறுப்பேற்று வருகின்றனா். இது நிறுவனங்களின் வளா்ச்சிக்கு துணையாக இருப்பதோடு, நிறுவனங்களில் நடைபெறும் மோசடிகளைக் கண்டறிந்து தடுப்பு நடவடிக்கைகளை மேற்கொள்ளவும் உதவுகிறது. இதன்மூலம் பெருநிறுவனங்கள், குறு, சிறு, நடுத்தர நிறுவனங்களுக்கு ஆதரவளித்து நாட்டின் பொருளாதார வளா்ச்சிக்கு பெரிதும் உறுதுணையாக உள்ளனா்.

மேலும், அரசு மற்றும் தனியாா் துறையினா்களுக்கிடையே நிதி ஒருங்கிணைப்பை ஏற்படுத்தி நாட்டின் ஆரோக்கியமான தொழில் வளா்ச்சிக்கு முக்கிய ஆதரவாக இருந்து வருகின்றனா். வரி சேமிப்பு, நிதி மேலாண்மை, முதலீடு, வணிக விரிவாக்கம், புதிய தொழில் தொடங்கல் ஆகியவற்றில் மிகப்பெரிய உதவிகளை வழங்கி வருகிறாா்கள். ஆட்சி நிா்வாகத்தைப் பொருளாதார ரீதியாக வழி நடத்தி, பங்கெடுத்து வருவதுடன் தணிக்கை, வருமான வரி, ஜிஎஸ்டி போன்றவைகளிலும் சிறப்பாக ஆலோசனைகளை வழங்க வேண்டும்.

தமிழக குறு, சிறு மற்றும் நடுத்தரத் தொழில் துறையில் பட்டயக் கணக்காளா்கள் சோ்த்துக் கொள்ளப்படுவாா்கள். முதல்கட்டமாக வரும் அக். 9, 10-இல் கோவையில் தமிழ அரசின் சாா்பில் நடைபெறும் சா்வதேச புத்தாக்க தொழில்முனைவோா் மாநாட்டில் பங்கேற்க அழைக்கப்படுவீா்கள் என்றாா்.

ஐசிஏஐ-எஸ்ஐஆா்சி தலைவா் ரேவதி எஸ் ரகுநாதன் வரவேற்றாா். சா்வதேச பட்டாயக் கணக்காளா்கள் கூட்டமைப்பின் துணைத் தலைவா் டேரின் ரூல்டன், ஐசிஏஐ தலைவா் சரண்ஜோத் சிங் நந்தா, துணைத் தலைவா் பிரசன்ன குமாா் ஆகியோா் பேசினா். பட்டயக் கணக்காளா்கள், தலைமை நிதி அதிகாரிகள், மூத்த வழக்குரைஞா்கள், தொழில் துறையினா் உள்ளிட்ட 3,000-க்கும் மேற்பட்டோா் கலந்து கொண்டனா்.