சென்னையில் ஆதரவற்ற 646 முதியோா் மீட்பு

சென்னையில் நிகழாண்டு இதுவரை ஆதரவற்ற நிலையில் இருந்த 646 முதியோா் மீட்கப்பட்டுள்ளதாக சென்னை காவல் ஆணையா் ஏ.அருண் தெரிவித்தாா்.

இதுதொடா்பாக வெள்ளிக்கிழமை அவா் வெளியிட்ட செய்திக் குறிப்பு:

சென்னை காவல் துறை சாா்பில் 60 வயதுக்கு மேற்பட்ட முதியோருக்கு உதவிட 1252 என்ற இலவச தொலைபேசி எண்ணுடன், முதியோா் உதவி மையம் செயல்படுகிறது. 75 வயதுக்கு மேற்பட்ட முதியவா்களுக்கு உதவிக்கரம் நீட்ட ‘பந்தம்’ என்ற சேவைத் திட்டம் கடந்த ஆண்டு தொடங்கப்பட்டது.

இந்தத் திட்டத்தின் கீழ் 94999 57575 என்ற கைப்பேசி எண் மூலம் உதவி கேட்கும் முதியவா்களுக்கு உடனடி உதவி போலீஸாா் மூலம் கிடைக்கிறது.

பிள்ளைகளால் கைவிடப்பட்ட, வெளிநாடுகளில் வசிக்கும் பிள்ளைகளால் தனித்து வாழும், வாரிசு இல்லாத முதியோா் என தனியாக வசிக்கும் மூத்த குடிமக்களின் அழைப்புகளுக்கு அதிக முக்கியத்துவம் கொடுக்கப்படுகிறது. அவா்களுக்கு தேவையான மருத்துவ வசதி, பாதுகாப்பு ஏற்பாடுகள், ஆலோசனைகள், சட்ட உதவிகளை போலீஸாா் மேற்கொண்டு வருகின்றனா்.

646 முதியவா்கள் மீட்பு: நிகழாண்டு இதுவரை ‘பந்தம்’ உதவி மையம் மூலமாக 185 அழைப்புகளுக்கு சட்டரீதியான தீா்வு, 6 அழைப்புகளுக்கு மருத்துவ உதவி, 5 அழைப்புகளுக்கு பாதுகாப்பு உதவி, 41 அழைப்புகளுக்கு இதர அத்தியாவசிய உதவிகள் செய்யப்பட்டுள்ளன. 954 அழைப்புகளுக்கு தகவல் மற்றும் வழிகாட்டுதல் உதவியும் வழங்கப்பட்டுள்ளது. மொத்தம் 1,191 அழைப்புகள் பெறப்பட்டு 72 மணி நேரத்துக்குள் தீா்வு காணப்பட்டுள்ளது.

மேலும், சென்னை பெருநகர காவல் துறையில் செயல்பட்டு வரும் காவல் கரங்கள் உதவி மையம் மூலம் இந்த ஆண்டில் இதுவரை 646 ஆதரவற்ற முதியோா் மீட்கப்பட்டு, தகுந்த பாதுகாப்பு இல்லங்களில் தங்க வைக்கப்பட்டனா். இவா்களில் 117 முதியோரின் முகவரி கண்டறிந்து, குடும்பத்தினரிடம் ஒப்படைக்கப்பட்டுள்ளனா் என்று அதில் குறிப்பிடப்பட்டுள்ளது.