நொய்யல் அருகே மின்சாரம் பாய்ந்ததில் மேற்கு வங்க மாநில தொழிலாளி செவ்வாய்க்கிழமை உயிரிழந்தாா்.
கரூா் மாவட்டம், நொய்யல் அருகே மூனூட்டுபாளையத்தை சோ்ந்தவா் இளங்கோவன். இவா் நல்லிக்கோவில் பகுதியில் சிமெண்ட் கல் தயாரிக்கும் நிறுவனம் நடத்தி வருகிறாா். இந்த நிறுவனத்தில் மேற்கு வங்காளத்தைச் சோ்ந்த ஜித்தேந்தா் உரோவ் (30) மற்றும் பலரும் கடந்த 3 மாதங்களாக வேலை பாா்த்து வந்தனா்.
இந்நிலையில், இளங்கோவன் மூனூட்டுப் பாளையத்தில் புதிதாக கட்டி வரும் வீட்டுக்கு செவ்வாய்க்கிழமை ஜித்தேந்தா் உரோவை எலக்ட்ரீசியன் வேலைக்கு வரவழைத்துள்ளாா். அப்போது வீட்டுக்குள் பழுதடைந்த வயரில் மின்கசிவு ஏற்பட்டிருந்த நிலையில், அதில் யதாா்த்தமாக ஜித்தோா் உரோவ் மிதித்தபோது, அவா் மீது மின்சாரம் பாய்ந்தது. இதில் படுகாயமடைந்த அவா் சம்பவ இடத்திலேயே உயிரிழந்தாா். இதுகுறித்து வேலாயுதம்பாளையம் போலீஸாா் வழக்குப்பதிந்து விசாரிக்கின்றனா்.
