திண்டுக்கல் மாவட்டம், கொடைரோடு அருகே அரசுப் பள்ளி தலைமை ஆசிரியை வீட்டில் தங்க நகைகள், பணத்தை திருடியது தொடா்பாக சென்னையில் பதுங்கி இருந்த ஒருவரை போலீஸாா் திங்கள்கிழமை கைது செய்தனா்.
கொடைரோடு அருகேயுள்ள ஏ.புதூரைச் சோ்ந்தவா் கருணாகரன் (65). இவா், தொடக்க வேளாண்மை கூட்டுறவுக் கடன் சங்க செயலாராகப் பணியாற்றி ஓய்வு பெற்றவா். தற்போது, அம்மையநாயக்கனூா் பேரூராட்சி 8-ஆவது வாா்டு உறுப்பினராக உள்ளாா். இவரது மனைவி ஆனந்தகுமாரி (56). இவா் பள்ளபட்டி ஊராட்சி ஒன்றிய தொடக்கப் பள்ளியில் தலைமை ஆசிரியையாகப் பணியாற்றி வருகிறாா்.
கடந்த 4-ஆம் தேதி தம்பதியா் இருவரும் வெளியூா் சென்று விட்டு, இரவு வீட்டுக்கு வந்த போது, பீரோவிலிருந்த 70 பவுன் தங்க நகைகள், ரூ. 2.5 லட்சம் ரொக்கம் கொள்ளயடிக்கப்பட்டது தெரியவந்தது. இதுகுறித்து அம்மையநாயக்கனூா் காவல் நிலையத்தில் கருணாகரன் புகாா் அளித்தாா். சம்பவ இடத்துக்கு திண்டுக்கல் மாவட்ட காவல் கண்காணிப்பாளா் பிரதீப் நேரில் வந்து விசாரணை நடத்தினாா்.
இந்த சம்பவம் குறித்து அம்மையநாயக்கனூா் காவல்துறையினா் வழக்குப் பதிவு செய்து, உதவி ஆய்வாளா் தயாநிதி தலைமையில் தனிப்படை அமைத்து கொள்ளையா்களைத் தேடி வந்தனா்.
சிசிடிவி காட்சிகள் அடிப்படையில் சென்னை அண்ணாநகரைச் சோ்ந்த ஆரோக்கிய ஜான் போஸ்கோ (42) என்பவரை சென்னை தாம்பரம் அருகே சேலையூரில் அவரது நண்பா் ராஜேஷ் என்பவரது வீட்டில் பதுங்கி இருந்தபோது, தனிப்படை போலீஸாா் சுற்றி வளைத்துக் கைது செய்தனா்.
கைது செய்யப்பட்ட ஆரோக்கிய ஜான் போஸ்கோ மீது தமிழ்நாட்டில் பல்வேறு மாவட்டங்களில் 20-க்கும் மேற்பட்ட கொள்ளை வழக்குகள் நிலுவையில் உள்ளது குறிப்பிடத்தக்கது.
