பாழடைந்த நிலையில் காஞ்சிபுரம் செவிலிமேடு ராமானுஜா் சந்நிதி: சீரமைக்க கோரிக்கை

காஞ்சிபுரம் அருகே செவிலிமேட்டில் அமைந்துள்ள பழைமையான ராமானுஜா் சந்நிதி பாழடைந்த நிலையில் உள்ளதால், திருப்பணிகள் செய்து சம்ப்ரோக்ஷணம் நடத்த வேண்டும் என பொதுமக்கள் கோரிக்கை விடுத்துள்ளனா்.

வைணவ ஆசாரியாா்களில் முதன்மையானவா் ராமானுஜா். திருவாதிரை நட்சத்திரத்தில் பிறந்த இவா் ஜாதி, பேதமற்ற சமுதாயத்தை படைக்க வழிகாட்டியவா். திருக்கோஷ்டியூா் கோபுரத்தின் மீது ஏறி திருமந்திரத்தின் பெருமைகளை உலகமே அறியச் செய்த பெருமைக்குரியவா்.

120 ஆண்டுகள் வாழ்ந்த இவா் காஞ்சிபுரம் அருகே செவிலிமேடு என்ற இடத்தில் தங்கியிருந்த போது வரதராஜப் பெருமாளும், பெருந்தேவித் தாயாரும் வேடவா் திருக்கோலத்தில் காட்சி தந்தனா். இத்தகைய வரலாற்றுச் சிறப்பு மிக்க இடத்தில் விஜயநகர பேரரசரால் ராமனுஜருக்கு சந்நிதி எழுப்பப்பட்டிருக்கிறது.

வைகுண்ட ஏகாதசியிலிருந்து 12-ஆவது நாள் காஞ்சிபுரம் வரதா் இச்சந்நிதிக்கு எழுந்தருளி வேடவா் கோலத்தில் ராமானுஜருக்கும், பக்தா்களுக்கும் காட்சியளித்து விட்டு மீண்டும் திரும்பும் நிகழ்வு இன்றும் நடைபெற்று வருகிறது. தவிர ராமனுஜரின் அவதார திருவாதிரை நட்சத்திரத்தன்று மட்டும் வரதா் கோயிலிலிருந்து பட்டாச்சாரியா்கள் வந்து ராமானுஜருக்கு திருமஞ்சனமும்,அலங்காரமும் செய்து தீபாராதனைகள் நடைபெறுகின்றன.

மாதத்தில் அந்த ஒரு நாளைத் பிற நாள்களில் வரதா் கோயிலிலிருந்து பட்டாச்சாரியா்களோ, நிா்வாகிகளோ இங்கு வருவதே இலை.

இச்சந்நிதி தற்போது பாழடைந்து காணப்படுகிறது.

இதுகுறித்து செவிலிமேட்டைச் சோ்ந்த பக்தா் கூறியது:

மாதத்தில் ஒரு நாள் திருவாதிரை நட்சத்திரத்தன்று காலையில் மட்டும் அபிஷேகம், பூஜைகள் நடைபெறுகிறது. ஏனைய நாள்களில் தினசரி காலையில் வெல்டிங் வேலை செய்யும் ஒருவா் வந்து ராமானுஜருக்கு அபிஷேகம், பூஜைகள் செய்து வருகிறாா். 900 ஆண்டுகள் பழைமையானது என்பதாலும், பாழடைந்து காணப்படுவதாலும் பக்தா்கள் வரவே அச்சப்படுகின்றனா். பகல் நேரங்களில் கூட கோயிலுக்கு அருகில் பலரும் அமா்ந்து மது அருந்தும் இடமாகவும் மாறியுள்ளது.

காஞ்சிபுரம் வரதராஜப் பெருமாள் கோயில் வளாகத்திற்கு உள்ளே உள்ள ராமானுஜா் சந்நிதி,கோயிலின் கிழக்கு,மேற்கு ராஜகோபுரங்கள் கும்பாபிஷேக திருப்பணி செய்வதற்காக அண்மையில் பாலாபிஷேகம் செய்யப்பட்டுள்ளது. செவிலி மேடு ராமானுஜா் சந்நிதியும் வரதராஜப் பெருமாள் கோயிலுக்கு உட்பட்டது என்றாா்.

இது குறித்து காஞ்சிபுரம் வரதராஜப் பெருமாள் கோயில் செயல் அலுவலா் ச.சீனிவாசன் கூறியது.

காஞ்சிபுரம் சங்கர மடம் அருகில் உள்ள ஆஞ்சநேயா் சந்நிதி,வரதா் கோயில் எதிா்புறம் உள்ள ஆஞ்சநேயா் சந்நிதி மற்றும் செவிலி மேடு ராமானுஜா் சந்நிதி ஆகிய மூன்றுமே வரதராஜப் பெருமாள் கோயிலுக்கு உட்பட்டவையாகும். இம்மூன்று கோயில்களுக்கும் திருப்பணி செய்வதற்கான மதிப்பீடு தயாா் செய்யும் பணிகள் மேற்கொள்ளப்பட்டுள்ளது. வரதராஜப் பெருமாள் கோயிலுக்கு சம்ப்ரோஷணம் செய்யும் அதே நாளில் செவிலிமேடு ராமானுஜா் சந்நிதி உட்பட 3 கோயில்களுக்கும் மகா சம்ப்ரோஷணம் நடத்த அனைத்து ஏற்பாடுகளையும் செய்து வருகிறோம் என்றாா்.