திருவாரூா்: திருவாரூரில், பள்ளி புத்தாக்க மேம்பாட்டுத் திட்டத்தின்கீழ், கண்டுபிடிப்புகளை உருவாக்கிய 12 மாணவ- மாணவிகள் குழுவினருக்கு திங்கள்கிழமை பரிசுத்தொகை வழங்கி, பாராட்டுத் தெரிவிக்கப்பட்டது.
திருவாரூா் மாவட்ட ஆட்சியா் அலுவலக கூட்டரங்கில் மக்கள் குறைதீா்க்கும் நாள் கூட்டம் ஆட்சியா் வ. மோகனச்சந்திரன் தலைமையில் நடைபெற்றது. கூட்டத்தில், பட்டா மாறுதல், புதிய குடும்ப அட்டை, ஆக்கிரமிப்பு அகற்றுதல், கல்விக் கடன், வீட்டுமனைப்பட்டா உள்ளிட்ட பல்வேறு கோரிக்கைகள் தொடா்பாக 295 மனுக்கள் அளிக்கப்பட்டன.
இம்மனுக்களை பெற்றுக்கொண்ட மாவட்ட ஆட்சியா், அவற்றை சம்பந்தப்பட்ட துறை அலுவலா்களிடம் வழங்கி, குறித்த காலத்துக்குள் நடவடிக்கை மேற்கொள்ளுமாறு உத்தரவிட்டாா்.
தொடா்ந்து, பள்ளிக் கல்வித் துறையின் சாா்பில் தமிழ்நாடு பள்ளி புத்தாக்க மேம்பாட்டு திட்டத்தின்கீழ் (2.0) நீரை பகுப்பாய்வு செய்தல், வெற்றிட தூய்மை உறிஞ்சி, மூங்கில் மர விதைப்புக் கலன், தண்ணீா் சேமிப்புத் தொட்டியை சுத்தமாக வைக்கும் கருவி, பாதுகாப்பான மின்சாரம், புல் அகற்றும் கருவி, மழைக் காலத்தில் ஏற்படும் விபத்துக்களைத் தடுக்கும் கருவி, விபத்துக்கான உடனடி சைகை, குடை வாகனம், தொப்பிக் காற்றாடி உள்ளிட்டவற்றை உருவாக்கிய 12 மாணவ- மாணவிகள் குழுவுக்கு தலா ரூ.10,000-க்கான காசோலையை வழங்கி, ஆட்சியா் பாராட்டுத் தெரிவித்தாா்.
தொடா்ந்து, பள்ளி புத்தாக்க மேம்பாட்டுத் திட்டத்தில் (2.0) அதிகளவிலான மாணவ-மாணவிகளை பங்கேற்க செய்தமையால் மாவட்ட முதன்மைக் கல்வி அலுவலருக்கு, தொழில் முனைவோா் மேம்பாட்டு புத்தாக்க நிறுவனம் மூலம் கேடயம் வழங்கப்பட்டது.
இந்நிகழ்வில், முதன்மைக் கல்வி அலுவலா் சௌந்தர்ராஜன், தனி துணை ஆட்சியா் (சமூக பாதுகாப்புத் திட்டம்) தையல்நாயகி, மாவட்ட வழங்கல் அலுவலா் செல்லபாண்டி, மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் சங்கா், மாவட்ட மாற்றுத்திறனாளிகள் நலத்துறை அலுவலா் புவனா, மாவட்ட திட்ட மேலாளா் சிவக்குமாா் உள்ளிட்ட பல்வேறு துறைகளின் உயா் அலுவலா்கள் பங்கேற்றனா்.
