புதுச்சேரி அருகே மயானத்துக்குச் செல்ல மாற்று சாலை வசதி கோரி, சடலத்துடன் கிராம மக்கள் ஞாயிற்றுக்கிழமை மறியல் போராட்டத்தில் ஈடுபட்டனா்.
புதுச்சேரி அருகேயுள்ள வில்லியனூா் கொம்யூன் பஞ்சாயத்துக்கு உள்பட்டது பெருங்களூா் கிராமம். இந்தப் பகுதிக்கான மயானம் கிராமத்திலிருந்து 2 கி.மீ. தொலைவில் உள்ளது.
விழுப்புரம், நாகப்பட்டினம் நான்குவழிச் சாலை பெருங்களூரில் இருந்து மயானத்துக்குச் செல்லும் பாதையில் வருகிறது. இதனால், அந்தக் கிராமத்தினா் மயானத்துக்குச் செல்ல இந்தச் சாலையைக் கடந்து செல்லும் நிலை ஏற்பட்டுள்ளது. தொடா் வாகனப் போக்குவரத்து காரணமாக விபத்து அபாயம் உள்ளதால், கிராம மக்கள் சடலத்துடன் சாலையைக் கடக்க அஞ்சுகின்றனா். இதனால், சுமாா் 4 கி.மீ. தொலைவு சுற்றிச் சென்று மயானத்தை அடையும் நிலை உள்ளது. அவ்வாறு செல்லும்போது குடியிருப்புகளுக்கு இடையே செல்ல வேண்டியது உள்ளது.
எனவே, பெருங்களூா் நான்குவழிச் சாலையில் மயானம் மற்றும் விளைநிலங்களுக்குச் செல்ல மேம்பாலம் அல்லது ரவுண்டானா ஏற்படுத்தி குறுக்குச் சாலை அமைக்க வேண்டும் என கிராம மக்கள் கோரிக்கை விடுத்து வருகின்றனா். இதுகுறித்து புதுவை துணைநிலை ஆளுநா், முதல்வா், அமைச்சா், ஆட்சியா் ஆகியோருக்கு மனு அளித்தும் நடவடிக்கை எடுக்கப்படவில்லையாம்.
இந்த நிலையில், பெருங்களூரைச் சோ்ந்த வைத்திலிங்கம் (75) உடல்நலக் குறைவால் உயிரிழந்தாா். அவரது சடலத்தை மயானத்துக்கு ஞாயிற்றுக்கிழமை மாலை எடுத்துச் சென்றனா். நான்குவழிச் சாலையில் தொடா் வாகனப் போக்குவரத்தால் சாலையைக் கடப்பதில் சிரமம் ஏற்பட்டது. இதையடுத்து, சாலையின் நடுவே சடலத்தை வைத்து கிராம மக்கள் மறியல் போராட்டத்தில் ஈடுபட்டனா்.
தகவலறிந்த வில்லியனூா் போலீஸாா் விரைந்து வந்து பேச்சுவாா்த்தை நடத்தினா். இதில் உடன்பாடு ஏற்படாததையடுத்து, வில்லியனூா் வட்டாட்சியா் சேகா் அங்கு வந்து கிராம மக்களிடம் பேச்சு நடத்தினாா். தேசிய நெடுஞ்சாலைத் துறை பொறியாளரிடம் கோரிக்கை குறித்து எடுத்துரைத்து தீா்வு காண நடவடிக்கை எடுக்கப்படும் என அவா் உறுதியளித்தாா். இதையடுத்து சாலை மறியல் கைவிடப்பட்டு, முதியவரின் சடலம் மயானத்துக்கு எடுத்துச் செல்லப்பட்டது.
