புதுமைப் பெண் திட்டத்தால் உயா் கல்வியில் பெண்கள் முன்னேற்றம்: அமைச்சா் ஆா்.காந்தி!

புதுமைப்பெண் திட்டத்தால் பெண்கள் உயா் கல்வியில் பெரும் முன்னேற்றம் அடைந்திருப்பதாக கைத்தறி மற்றும் துணி நூல் துறை அமைச்சா் ஆா்.காந்தி திங்கள்கிழமை பேசினாா்.

அரசு உதவி பெறும் கல்லூரிகளிலும் புதுமைப்பெண் திட்ட விரிவாக்கத்தின் அடிப்படையில் கல்வி உதவித்தொகை வழங்கும் விழா காஞ்சிபுரம் பச்சையப்பன் மகளிா் கல்லூரி வளாகத்தில் நடைபெற்றது.

விழாவுக்கு, மாவட்ட ஆட்சியா் கலைச்செல்வி மோகன் தலைமை வகித்தாா். எம்.பி. க.செல்வம், எம்எல்ஏ-க்கள் க.சுந்தா், எழிலரசன், மேயா் எம்.மகாலட்சுமி யுவராஜ் ஆகியோா் முன்னிலை வகித்தனா். கல்லூரி முதல்வா் கோமதி வரவேற்றாா். விழாவில் அமைச்சா் ஆா்.காந்தி கலந்து கொண்டு அரசு உதவி பெறும் 53 கல்லூரிகளை சோ்ந்த 248 மாணவியருக்கு புதுமைப்பெண் திட்ட கல்வி உதவித் தொகையை வழங்கிப் பேசியது:

சமூக நலன் மற்றும் மகளிா் உரிமைத் துறை சாா்பில் புதுமைப்பெண் திட்டமானது தற்போது அரசு உதவி பெறும் கல்லூரிகளில் பயிலும் மாணவியருக்கு வழங்கப்படவுள்ளது. இந்த திட்டத்தால் கடந்த 2022-ஆம் ஆண்டு முதல் 7,777 மாணவியருக்கு மாதந்தோறும் ரூ. 1,000 என மொத்தம் ரூ. 20.99 கோடி வழங்கப்பட்டுள்ளது.

ஆகஸ்ட் 2024 முதல் தற்போது வரை தமிழ்ப்புதல்வன் திட்டத்தின் கீழ், 8,599 மாணவா்களுக்கு தலா ரூ. 1,000 வீதம் ரூ. 4.30 கோடி வழங்கப்பட்டுள்ளது. இந்தத் திட்டமானது உயா் கல்வியில் பெண்களின் சோ்க்கையை அதிகரிக்கும் நோக்கத்துடன் அறிமுகப்படுத்தப்பட்டது. இதனால் பெண்களின் உயா் கல்வியில் பெரும் முன்னேற்றம் ஏற்பட்டுள்ளது என்றாா்.

விழாவில், காஞ்சிபுரம் சாா்-ஆட்சியா் ஆஷிக்அலி உள்ளிட்ட கல்லூரி பேராசிரியைகள், மாணவிகள் பலா் கலந்து கொண்டனா்.