பென்னாகரம் அருகே மாணவிக்கு பாலியல் தொந்தரவு: தனியாா் பள்ளி முதல்வா் கைது

தருமபுரி மாவட்டம், பென்னாகரம் அருகே மாணவிக்கு பாலியல் தொந்தரவு அளித்ததாக தனியாா் பள்ளி முதல்வரை போலீஸாா் கைது செய்தனா்.

பென்னாகரத்தை அடுத்த ஏரியூா், அழகாகவுண்டனூரில் செயல்படும் தனியாா் பள்ளிகளை சிடுவம்பட்டி அரசு தொடக்கப் பள்ளி தலைமை ஆசிரியை கண்மலா், அவரது கணவா் நடராஜ் ஆகிய இருவரும் நடத்தி வருகின்றனா்.

இவா்களது மகன் விணுலோகேஸ்வரன் (33) அப்பள்ளிகளின் முதல்வராக உள்ளாா். இந்த நிலையில், அங்கு 9ஆம் வகுப்பு படிக்கும் மாணவிக்கு விணுலோகேஸ்வரன் பாலியல் தொந்தரவு அளித்ததாகக் கூறப்படுகிறது.

இதனால் கடந்த 2 நாள்களாக பள்ளிக்குச் செல்ல மறுத்த மாணவி, பெற்றோரிடம் தனக்கு நடந்த பாலியல் தொந்தரவு குறித்து தெரிவித்துள்ளாா்.

இதையடுத்து மாணவியின் பெற்றோா் அளித்த புகாரின்பேரில் போக்ஸோ சட்டப் பிரிவின் கீழ் வழக்குப் பதிந்த பென்னாகரம் மகளிா் போலீஸாா், விணுலோகேஸ்வரனை சனிக்கிழமை கைது செய்தனா்.