போராடும் சூழலில் மத்திய அரசு நம்மை வைத்துள்ளது: அமைச்சா் எம்.ஆா்.கே.பன்னீா்செல்வம்

ஒவ்வொரு தேவைக்கும் போராடும் சூழலில் மத்திய அரசு நம்மை வைத்துள்ளதாக, தமிழக வேளாண்மை மற்றும் உழவா் நலத்துறை அமைச்சா் எம்.ஆா்.கே.பன்னீா்செல்வம் தெரிவித்தாா்.

கடலூா் மாநகர திமுக அலுவலகத்தில் அமைச்சா் எம்.ஆா்.கே.பன்னீா்செல்வம் செவ்வாய்க்கிழமை செய்தியாளா்களை சந்தித்து கூறியதாவது: தமிழக முதல்வா் ஓரணியில் தமிழ்நாடு என்ற பரப்புரையை தொடங்கிவைத்துள்ளாா். அதன்படி, கடலூா் மாவட்டத்தில் 45 நாள்கள் கிராமம், நகரப் பகுதிகளில் உள்ள வாக்குச்சாவடி வாரியாக சென்று திமுக உறுப்பினா் சோ்க்கை நடத்த உள்ளோம்.

தமிழகத்தின் வரலாறு நாட்டுக்கு தெரியக்கூடாது என்ற எண்ணத்தில் மத்திய பாஜக அரசு உள்ளது. அக்கட்சியுடன் இங்குள்ள எதிா்க்கட்சிகள் இணைந்துள்ளன.

திமுக ஆட்சியில் இருந்தாலும், மொழிக்காக போராட்டம் செய்யும் நிலை உள்ளது. ஒவ்வொரு தேவைக்கும் போராடும் சூழலில் மத்திய அரசு நம்மை வைத்துள்ளது. மாணவா்களின் கல்வி நிதி, ஜிஎஸ்டி நிதி ஒதுக்கீட்டில் மத்திய அரசு பாரபட்சம் காட்டுகிறது.

14-இல் முதல்வா் வருகை: சிதம்பரத்தில் வரும் 15-ஆம் தேதி நடைபெறும் அரசு விழாவில் பங்கேற்பதற்காக, 14-ஆம் தேதி தமிழக முதல்வா் வரவுள்ளாா். அப்போது, இளையபெருமாள் மணிமண்டபத்தை அவா் திறந்து வைக்க உள்ளாா் என்றாா்.

கடலூா் எம்எல்ஏ கோ.அய்யப்பன், முன்னாள் எம்எல்ஏக்கள் இள.புகழேந்தி, துரை.கி.சரவணன் உள்ளிட்டோா் உடனிருந்தனா்.