மங்களூா் வங்கிக் கொள்ளை வழக்கில் தொடா்புடைய திருநெல்வேலி மாவட்டம், பத்மனேரியில் உள்ள முருகாண்டி வீட்டில் மங்களூா் தனிப்படை போலீஸாா் வியாழக்கிழமை இரவு முதல் வெள்ளிக்கிழமை மாலைவரை சோதனை நடத்தினா்.
இதில், பல கோடி ரூபாய் பணம் மற்றும் தங்க நகைகளை பறிமுதல் செய்துள்ளனா்.
கா்நாடக மாநிலம், மங்களூா் உல்லால் அருகே கே.சி. சாலையில் உள்ள கோட்டேகா் வேளாண் கூட்டுறவு வங்கியின் கிளைக்குள் ஜன.17ஆம் தேதி 6 போ் கொண்ட கும்பல் நுழைந்து, ஊழியா்களை அச்சுறுத்தி, வங்கியைக் கொள்ளையடித்தது.
இதையடுத்து, மங்களூா் காவல் ஆணையா் அனுபம்அகா்வால் உத்தரவின் பேரில், 8 தனிப்படைகள் அமைக்கப்பட்டு விசாரணை நடைபெற்று வந்தது.
விசாரணையில், தமிழகத்தை பூா்வீகமாகக் கொண்டு மும்பையில் வசித்துவரும் 3 போ் கொண்ட கும்பலுக்கு தொடா்பு இருப்பது கண்டுபிடிக்கப்பட்டது.
இதையடுத்து, திருநெல்வேலி மாவட்டம், களக்காடு அருகேயுள்ள பத்மனேரியைச் சோ்ந்த முருகாண்டி (35), அவரது நண்பா் மணிவண்ணன் (36), கூட்டாளி ஜோசுவா ராஜேந்திரன் என்ற பிரகாஷ் (35) ஆகியோா் கடந்த சில தினங்களுக்கு முன் மங்களூா் போலீஸாரால் கைது செய்யப்பட்டனா்.
இந்நிலையில், திருநெல்வேலி மாவட்டம், களக்காடு அருகேயுள்ள பத்மனேரியில் உள்ள முருகாண்டியின் வீட்டில் மங்களூா் காவல் ஆய்வாளா்கள் ராஜேந்திரபிரசாத், நாகராஜன் தலைமையிலான 2 தனிப்படை போலீஸாா் வியாழக்கிழமை இரவுமுதல் வெள்ளிக்கிழமை மாலை வரையிலும் தொடா்ந்து சோதனை நடத்தினா்.
இதில், கோடிக்கணக்கான ரூபாய் மதிப்பிலான தங்கநகை, பணம் பறிமுதல் செய்யப்பட்டுள்ளதாகக் கூறப்படுகிறது.
மேலும், மங்களூா் போலீஸாா் மூருகாண்டியின் தந்தை சண்முகசுந்தரத்தை (55) கைது செய்து, நான்குனேரி அரசு மருத்துவமனையில் மருத்துவ பரிசோதனைகளுக்குப்பிறகு நான்குனேரி நீதிமன்றத்தில் ஆஜா்படுத்திவிட்டு, பின்னா் அவரை மங்களூா் அழைத்து சென்றனா்.
பத்மனேரியில் உள்ள மூருகாண்டியின் வீட்டில் 2 தனிப்படை போலீஸாா் விசாரணை நடத்தி வந்த நிலையில், நான்குனேரி நீதிமன்றத்தில் அவரது தந்தையை ஆஜா்படுத்திய போது, கூடுதலாக 10-க்கும் மேற்பட்ட மங்களூா் வாகனங்கள் வந்திருந்தன.
