மதுக்கரையில் ‘உங்களைத் தேடி உங்கள் ஊரில்’ திட்டத்தின்கீழ் மாவட்ட ஆட்சியா் ஆய்வு

‘உங்களைத் தேடி உங்கள் ஊரில்’ திட்டத்தின்கீழ் மதுக்கரை வட்டத்தில் மாவட்ட ஆட்சியா் பவன்குமாா் க.கிரியப்பனவா் ஆய்வு மேற்கொண்டாா்.

கோவை மாவட்டம், மதுக்கரை வட்டத்துக்குள்பட்ட பள்ளிகளில் ஆய்வு செய்த பள்ளிக்குத் தேவையான கட்டமைப்புகள், முதல்வரின் காலை உணவுத் திட்டம், ஊராட்சி பகுதிகளில் தெருவிளக்குகள், குடிநீா், வடிகால் வசதிகள் உள்ளிட்டவை குறித்து சம்பந்தப்பட்ட அலுவலா்களிடம் கேட்டறிந்தாா்.

மதுக்கரை நகராட்சி 21-ஆவது வாா்டில் அமைக்கப்பட்டு வரும் கூடுதல் அலுவலக கட்டுமானப் பணிகள், பாரதி காலனியில் 3 லட்சம் லிட்டா் கொள்ளளவு கொண்ட மேல்நிலை நீா்த்தேக்கத் தொட்டி கட்டுமானப் பணி ஆகியவற்றை ஆய்வு செய்தாா்.

மதுக்கரை முஸ்லீம் காலனி ஆரம்ப சுகாதார நிலையத்தில் ஆய்வு செய்து செவிலியா் வருகை மற்றும் மருந்துகளின் இருப்பு விவரங்கள் குறித்து கேட்டறிந்தாா். தொடா்ந்து, மாவுத்தம்பதி பழங்குடியின கிராமத்தில் பிரதம மந்திரி ஜன்மான் திட்டத்தில் கட்டப்பட்டு வரும் வீடுகளை ஆய்வு செய்தாா்.

இதையடுத்து, மதுக்கரை நகராட்சி அலுவலகத்தில் வருவாய்த் துறை அலுவலா்களுடனான ஆய்வுக் கூட்டம் ஆட்சியா் பவன்குமாா் க.கிரியப்பனவா் தலைமையில் நடைபெற்றது. இதில், பொதுமக்களிடம் இருந்து கோரிக்கை மனுக்களைப் பெற்றுக்கொண்டாா்.

இந்தக் கூட்டத்தில் கூடுதல் ஆட்சியா் (வளா்ச்சி) சங்கேத் பல்வந்த் வாகே, வருவாய் கோட்டாட்சியா் (தெற்கு) ராம்குமாா், தனித் துணை ஆட்சியா் (சமூகப் பாதுகாப்புத் திட்டம்) சங்கீதா, மதுக்கரை நகா்மன்றத் தலைவா் நூா்ஜஹான் நாசா், நகராட்சி ஆணையா் சத்யா, வட்டாட்சியா் வேல்முருகன், நகா்மன்ற துணைத் தலைவா் ரமேஷ்குமாா் உள்ளிட்ட பலா் கலந்துகொண்டனா்.