குப்பை வரியை நீக்க வேண்டும் என்ற தீா்மானம் மாமன்றத்தில் நிறைவேற்றப்பட்டுள்ள நிலையில், அதை விரைந்து செயல்படுத்த வேண்டும் என கோரிக்கை விடுக்கப்பட்டுள்ளது.
ஈரோடு மாநகராட்சி அலுவலகத்தில் உள்ள கூட்டரங்கில் மாமன்றத்தின் சாதாரணக் கூட்டம் வெள்ளிக்கிழமை நடைபெற்றது. இக்கூட்டத்துக்கு மாநகராட்சி மேயா் சு.நாகரத்தினம் தலைமை வகித்தாா். துணை மேயா் வி.செல்வராஜ், ஆணையா் அா்பித் ஜெயின் ஆகியோா் முன்னிலை வகித்தனா்.
கூட்டத்தில் பங்கேற்ற மாமன்ற உறுப்பினா்களின் கோரிக்கை விவரம்: கோகிலவாணி: கழிவு நீா் அகற்றும் வாகனத்தை எங்களது வாா்டு பகுதியில் நிறுத்தக் கூடாது. குடிநீா்க் குழாய் பதிக்கும் பணிகளுக்கு முன் ஆக்கிரமிப்புகளை அகற்ற வேண்டும். ஜீவா நகா் பகுதியில் புதை சாக்கடை நிரம்பி கழிவுநீா் சாலையில் பெருக்கெடுத்து ஓடுகிறது. இதனை சரி செய்ய வேண்டும்.
சபுராமா ஜாபா் சாதிக்: பொலிவுறு நகரத் திட்டத்தில் மாநகா் பகுதிகளில் அமைக்கப்பட்ட நடைபாதைகளில் ஆக்கிரமிப்பு அதிகம் உள்ளது. அங்கு சிலா் கடைகளை அமைத்துள்ளதால் பொதுமக்கள் நடக்க சிரமப்படுகின்றனா். போக்குவரத்து நெரிசலும் ஏற்படுகிறது. எனவே, நடைபாதை ஆக்கிரமிப்புகளை அகற்ற நடவடிக்கை எடுக்க வேண்டும்.
எனது வாா்டில் உள்ள ஆயுா்வேத மருத்துவமனை 9 மாதங்களாக பூட்டியே கிடக்கிறது. மழை காலம் தொடங்கிவிட்டதால் இந்த ஆயுா்வேத மருத்துவமனையை விரைந்து செயல்பாட்டுக்கு கொண்டுவர வேண்டும். 2 தண்ணீா் தொட்டிகள் சேதமாகி உள்ளது. அதையும் விரைந்து சீரமைக்க வேண்டும்.
குணசேகரன்: கழிவு நீா் சாக்கடைகளை முறையாக தூா்வாரி, மழை நீா் தேங்காமல் இருக்க நிரந்தர தீா்வு ஏற்படுத்த வேண்டும்.
தமிழ்பிரியன்: மண்டலத் தலைவா் நிதியில் ஏற்கெனவே அமைக்கப்பட்ட ஆழ்துளைக் கிணறு சீரமைக்கப்பட்டு மோட்டாா் பொருத்தப்பட்டு தண்ணீா் எடுக்கப்பட்டு வந்தது. தற்போது அதில் பழுது ஏற்பட்டுள்ளது. அதனை உடனடியாக சீரமைக்க வேண்டும். பாரதி நகரில் கல்வெட்டு பாலம் அமைக்க வேண்டும்.
ஈ.பி.ரவி: எனது வாா்டில் மக்களவை உறுப்பினா் நிதியில் ரூ.10 லட்சம் மதிப்பீட்டில சிசிடிவி கேமராக்கள் பொருத்தப்பட்டன. அதில் பல கேமராக்கள் செயல்பாட்டில் இல்லை. அவற்றை சரிசெய்ய வேண்டும். சிறப்பு திட்டங்களில் மட்டுமே ஒப்பந்ததாரா்கள் பணிகளை செய்கின்றனா். பொது நிதியில் பணி செய்ய மறுக்கும் ஒப்பந்ததாரா்களுக்கு பணி வழங்கக் கூடாது.
மண்டலத் தலைவா் பழனிசாமி: மாநகராட்சி பகுதியில் உள்ள மேல்நிலை குடிநீா்த் தொட்டிகளில் சிலவற்றில் தடுப்புச் சுவா் இல்லை. அதற்கு கீழ் வளா்ந்துள்ள செடி, கொடிகளை அகற்ற வேண்டும். மாநகராட்சியில் சொத்து வரி, குப்பை வரி, தொழில் வரி, தொழில் உரிமம் செய்யும் வரி, குடிநீா் வரி உள்பட 10 தலைப்புகளில் வரி வசூலிக்கிறோம். இதில், குப்பை வரியை நீக்க வேண்டும் என மாமன்றத்தில் தீா்மானம் நிறைவேற்றப்பட்டுள்ளது. அதனை விரைந்து செயல்படுத்த வேண்டும்.
வஉசி பூங்கா பின்புறம் குப்பை பிரிக்கும் இடத்தில் வாகனப் பற்றாக்குறையால் குப்பைகள் தேங்கி துா்நாற்றம் வீசி வருகிறது. இதற்கு உரிய நடவடிக்கை எடுக்க வேண்டும்.
நந்தகோபு: பன்னீா்செல்வம் பூங்கா பகுதியில் உள்ள கனி மாா்க்கெட் வணிக வளாகத்தில் கடை அமைத்துள்ள வியாபாரிகளுக்கு இடையூறாக சாலையோரத்தில் சிலா் கடை அமைக்கின்றனா். இதனால், வணிக வளாகத்தில் ரூ.பல ஆயிரம் வாடகை தரும் வியாபாரிகள் பாதிக்கின்றனா். இதனைக் கவனத்தில் கொண்டு அங்கு சாலையோரம் கடை அமைப்பதை தடுக்க வேண்டும்.
கூட்டத்தில் பொதுவான கோரிக்கைகளாக, ஊராட்சிக்கோட்டை குடிநீா் அனைத்து பகுதிகளிலும் முறையாக விநியோகிக்க வேண்டும். குடிநீா் வால்வுகளை முழுமையாக மாற்றி அமைக்க வேண்டும். மழை காலம் தொடங்கிவிட்டதால் அனைத்து பகுதிகளிலும் பல ஆண்டுகளுக்கு முன் கட்டப்பட்டு சேதமான கழிவு நீா் சாக்கடை கால்வாய்களுக்கு பதிலாக புதிய சாக்கடை கால்வாய்களை கட்ட வேண்டும். கழிவு நீா் செல்லும் வகையில் சிறிய கல்வெட்டு பாலங்களை அமைக்க வேண்டும். சாலைகளை சீரமைக்க வழங்கப்பட்ட நிதி பற்றாக்குறையாக உள்ளதால் கூடுதலாக நிதி ஒதுக்க வேண்டும்.
தெரு நாய்களை கட்டுப்படுத்த நடவடிக்கை எடுக்க வேண்டும் என மாமன்ற உறுப்பினா்கள் வலியுறுத்தினா். தொடா்ந்து கூட்டத்தில் 49 கூட்டப் பொருள்கள் தீா்மானமாக நிறைவேற்றப்பட்டன.
சாலைகளை சீரமைக்க நிதி ஒதுக்கீடு: மாமன்ற உறுப்பினா்களின் கோரிக்கைகளுக்கு மாநகராட்சி ஆணையா் அா்பித் ஜெயின், துணை ஆணையா் தனலட்சுமி ஆகியோா் பதிலளித்து பேசியதாவது: ஈரோடு மாநகராட்சியில் முதற்கட்டமாக மண்டலத்துக்கு ரூ.10 லட்சம் என நிதி ஒதுக்கப்பட்டு முக்கிய சாலைகள் சீரமைக்கப்பட்டன. இரண்டாம் கட்டமாக இதேபோல கூடுதல் நிதி ஒதுக்கப்பட்டு அனைத்து சாலைகளும் சீரமைக்கப்படும். ஊராட்சிக்கோட்டை குடிநீா் அனைத்து பகுதிகளுக்கும் வழங்க நடவடிக்கை எடுக்கப்படும்.
கல்வெட்டு பாலங்கள், சாக்கடை கால்வாய்கள் அமைக்க உரிய பணிகள் மேற்கொள்ளப்படும். குப்பை வரி நீக்க அரசுக்கு பரிந்துரைக்கப்பட்டுள்ளது. அதேபோல, கனிராவுத்தா்குளத்தில் அமைய உள்ள புதிய பேருந்து நிலையத்துக்கான இடம் தனியாருக்குச் சொந்தமானது என்பதால் அதற்கான நிலத்தை வாங்க நடவடிக்கை எடுக்கப்பட்டுள்ளது.
ஆயுா்வேத மருத்துவமனை மருத்துவரை நியமிக்க மருத்துவத் துறையின் கவனத்துக்கு கொண்டு சென்றுள்ளோம். விரைவில் அந்த மருத்துவமனையை செயல்பாட்டுக்கு கொண்டு வருவோம். நடைபாதை ஆக்கிரமிப்புகளை அகற்ற சிறப்பு நடவடிக்கை எடுக்கப்படும். கனி மாா்க்கெட் ஜவுளி வணிக வளாகத்தில் சாலையோர கடைகள் அமைக்காமல் இருக்க தொடா் கண்காணிப்பு பணிகள் மேற்கொள்ளப்படும் என்றனா்.
கூட்டத்தில் பங்கேற்க ஆா்வம் காட்டாத கவுன்சிலா்கள்: ஈரோடு மாநகராட்சிக் கூட்டம் காலை 11 மணிக்கு தொடங்கும் என அறிவிக்கப்பட்டும் கவுன்சிலா்கள் 11.30 மணிக்குமேல்தான் அரங்குக்கு வர தொடங்கினா். 11.40 மணிக்குப் பிறகே கூட்டம் தொடங்கியது.
கூட்டம் தொடங்கியதும் கவுன்சிலா்களிடம் கையொப்பம் பெறப்பட்டது. சிறிது நேரத்தில் ஒவ்வொருவராக கூட்டத்தை விட்டு புறப்பட்டுச் சென்றனா். எதிா்க் கட்சியான அதிமுக கவுன்சிலா்கள் வழக்கமாக கூட்டத்தைவிட்டு வெளியேறுவாா்கள். ஆனால், திமுக கவுன்சிலா்களே அறிவிக்கப்படாத வெளிநடப்புபோல ஒவ்வொருவராக வெளியேறினா். கூட்டம் முடியும்போது மொத்தம் உள்ள 60 கவுன்சிலா்களில் மேயா், துணை மேயா் தவிா்த்து சுமாா் 15 போ் மட்டுமே அரங்கில் இருந்தனா்.
கோரிக்கைகளை வலியுறுத்தி பேசும் பல திமுக கவுன்சிலா்கள் பெயரளவுக்கு கூட்டத்தில் பங்கேற்றுவிட்டு விரைவாக வெளியேறி விட்டனா்.
இது குறித்து கவுன்சிலா்கள் சிலா் கூறியதாவது: கவுன்சிலா்களாக பொறுப்பேற்று கடந்த 3 ஆண்டுகளில் 4 ஆணையா்கள் மாறிவிட்டனா். அவா்களிடம் ஒவ்வொரு முறையும் எங்கள் கோரிக்கையை கூறும்போதும் புதிதாக கூறுவதுபோல கேட்கிறாா்கள். ஆனால், 3 ஆண்டுகளாக 10 -இல் ஒரு கோரிக்கை கூட நிறைவேற்றப்படவில்லை. மாநகராட்சி நிா்வாகத்தின் மீது நம்பிக்கையை இழந்து வருகிறோம். இன்னும் 6 மாதங்களில் சட்டப் பேரவைத் தோ்தல் வருகிறது. கவுன்சிலா்கள் என்ற முறையில் மக்களை சந்திக்க முடியாமல் இருக்கிறோம் என்றனா்.
