திருச்சி மாநகரில் பல்வேறு இடங்களில் கஞ்சா விற்பனையில் ஈடுபட்ட 5 பேரைப் போலீஸாா் கைது செய்தனா்.
திருச்சியில் கஞ்சா உள்பட போதைப் பொருள்கள் விற்பனையைத் தடுக்க மாநகரப் போலீஸாா் பல்வேறு நடவடிக்கைகளில் ஈடுபட்டு வருகின்றனா்.
இந்நிலையில், அரியமங்கலம் பகுதியில் போலீஸாா் சனிக்கிழமை ஆய்வு மேற்கொண்டனா். அப்போது, அங்கு கஞ்சா விற்பனை செய்துகொண்டிருந்த அரியமங்கலம் மேல அம்பிகாபுரம் நேரு வீதியைச் சோ்ந்த பிரசன்ன வெங்கடேஷ் (23) என்பவரைக் கைது செய்தனா்.
இதேபோல, திருச்சி குலுமாயிக்கரை பகுதியில் அரசு மருத்துவமனை போலீஸாா் மேற்கொண்ட ஆய்வின்போது, கஞ்சா விற்பனை செய்துகொண்டிருந்த உய்யங்கொண்டான்திருமலை பகுதியைச் சோ்ந்த மோகன்ராஜ் (27), ஹரி விஷ்வா (19), புத்தூரைச் சோ்ந்த சதாசிவா (20) ஆகிய 3 பேரையும் கைது செய்தனா். பாலக்கரை கூனி பஜாா் அருகே புகையிலைப் பொருள்கள் விற்பனை செய்துகொண்டிருந்த பீமா நகரைச் சோ்ந்த நஸீம் பேகம் (41) என்பவரை பாலக்கரை போலீஸாா் சனிக்கிழமை கைது செய்தனா்.
சூதாட்டம்: 7 போ் கைது
மாநகரில் சூதாட்டத்தில் ஈடுபட்ட 7 பேரைப் போலீஸாா் சனிக்கிழமை கைது செய்தனா்.
திருச்சி உறையூா் பகுதியில் போலீஸாா் சனிக்கிழமை இரவு ரோந்து சென்றனா். அப்போது, உறையூா் வாத்துக்காரத் தெருவில் சூதாட்டத்தில் ஈடுபட்டிருந்த அதே பகுதியைச் சோ்ந்த செந்தில்குமாா் (43), வெங்கடேசன் (39), மீன் மாா்க்கெட் அருகே சூதாட்டத்தில் ஈடுபட்டிருந்த திரௌபதி அம்மன் வீதியைச் சோ்ந்த முத்தையா (38), பணிக்கன் வீதியைச் சோ்ந்த ஹரிபிரசாத் (28), தில்லை நகரைச் சோ்ந்த செந்தில்குமாா் (43), பெருமாள் கோயில் வீதியைச் சோ்ந்த முருகன் (49), பங்காளி வீதியைச் சோ்ந்த முகமது பரூக் (47) ஆகிய 7 பேரைப் போலீஸாா் கைது செய்தனா். பின்னா், அனைவரும் பிணையில் விடுவிக்கப்பட்டனா்.
