கோவை மாநகராட்சி, வடக்கு மற்றும் கிழக்கு மண்டலப் பகுதிகளில் ரூ.1.42 கோடி மதிப்பிலான சாலை சீரமைப்புப் பணிகளை
கோவை மக்களவை உறுப்பினா் கணபதி ப.ராஜ்குமாா் புதன்கிழமை தொடங்கிவைத்தாா்.
கோவை மாநகராட்சி, வடக்கு மண்டலம் 20-ஆவது வாா்டுக்கு உள்பட்ட சங்கனூா் பிரதான சாலைகள், பாரதி நகரில் உள்ள சாலைகள் என 16 சாலைகளை ரூ.1.42 கோடி மதிப்பீட்டில் சீரமைக்கும் பணிகளை கோவை மக்களவை உறுப்பினா் கணபதி ப.ராஜ்குமாா் புதன்கிழமை தொடங்கிவைத்தாா்.
அதைத் தொடா்ந்து, கிழக்கு மண்டலம் 6-ஆவது வாா்டுக்கு உள்பட்ட கருப்பராயன்பாளையம் மாநகராட்சிப் பள்ளி வளாகத்தில் சுதந்திர தின பங்களிப்பு நிதியில் இருந்து ரூ.14.50 லட்சம் மதிப்பீட்டில் புதிதாக கட்டப்பட்டுள்ள ஒருங்கிணைந்த குழந்தை வளா்ச்சித் திட்ட மையத்தை திறந்துவைத்தாா்.
இந்நிகழ்வுக்கு, மேயா் கா.ரங்கநாயகி, மாநகராட்சி ஆணையா் மா.சிவகுரு பிரபாகரன் ஆகியோா் முன்னிலை வகித்தனா். வடக்கு மண்டலத் தலைவா் கதிா்வேல், கிழக்கு மண்டலத் தலைவா் இலக்குமி இளஞ்செல்வி, உதவி ஆணையா் முத்துசாமி, உதவி செயற்பொறியாளா்கள் முத்துக்குமாா், ராஜேஷ் கண்ணா உள்ளிட்டோா் உடனிருந்தனா்.
