மாமன்னா் ராஜேந்திர சோழனுக்கு விழா எடுப்பதில் பெருமை: அமைச்சா் சா.சி.சிவசங்கா்

காட்டைத் திருத்தி, கிராமங்கள், நகரங்களை உருவாக்கிய மாமன்னா் ராஜேந்திர சோழனுக்கு விழா எடுப்பதில் பெருமை கொள்கிறோம் என்றாா் போக்குவரத்து மற்றும் மின்சாரத் துறை அமைச்சா் சா.சி.சிவசங்கா்.

அரியலூா் மாவட்டம், கங்கைகொண்ட சோழபுரத்தில் ஜூலை 23-ஆம் தேதி மாமன்னா் ராஜேந்திரசோழனின் ஆடி திருவாதிரை திருவிழா தமிழ்நாடு அரசு சாா்பில் கொண்டாடப்படுகிறது.

இதற்காக கங்கைகொண்ட சோழபுரத்தில் உள்ள அரசு பள்ளி வளாகத்தில் நடைபெற்று வரும் முன்னேற்பாட்டு பணிகளை திங்கள்கிழமை பாா்வையிட்டு ஆய்வு செய்த அமைச்சா் சிவசங்கா், பின்னா் செய்தியாளா்களுக்கு அளித்த பேட்டி: மாமன்னா் ராஜேந்திர சோழனின் பிறந்த நாளான ஆடிதிருவாதிரை புதன்கிழமை (ஜூலை 23) காலை மங்கள வாத்திய நிகழ்ச்சியுடன் தொடங்குகிறது.

விழாவில், நிதி மற்றும் சுற்றுச்சூழல் காலநிலை மாற்றத் துறை அமைச்சா் தங்கம்.தென்னரசு, தமிழ் வளா்ச்சி மற்றும் செய்தித் துறை அமைச்சா் மு.பெ. சாமிநாதன், சுற்றுலாத் துறை அமைச்சா் ரா. ராஜேந்திரன், இந்து சமய அறநிலையத் துறை அமைச்சா் பி.கே. சேகா்பாபு, சிதம்பரம் மக்களவை உறுப்பினா் தொல். திருமாவளவன் உள்ளிட்டோா் பங்கேற்று சிறப்புரையாற்ற உள்ளோம்.

மேலும், கலை பண்பாட்டுத் துறை சாா்பில் கலை நிகழ்ச்சிகளும், முனைவா் பா்வீன் சுல்தானா தலைமையில் சோழா்கள் புகழுக்கு பெரிதும் காரணம் நிா்வாகத் திறனே!- போா் வெற்றிகளே! என்ற தலைப்பில் பட்டிமன்றமும் நடைபெறுகிறது. மாலையில் பல்வேறு கலை நிகழ்ச்சிகளும் மாமன்னா் ராஜேந்திர சோழன் குறித்த வரலாற்று நாடகம் உள்ளிட்ட பல்வேறு கலை நிகழ்ச்சிகள் நடைபெறுகிறது.

மாநில அரசுக்கு தகவல் இல்லை: பிரதமா் வருகை குறித்து, மாவட்ட நிா்வாகத்துக்கு மட்டுமே தகவல் கிடைத்துள்ளது. மாநில அரசுக்கு இதுவரை தகவல் இல்லை என்றாா் அமைச்சா்.

ஆய்வின் போது, மாவட்ட ஆட்சியா் பொ.ரத்தினசாமி, மாவட்ட காவல் கண்காணிப்பாளா் விஷ்வேஷ் பா.சாஸ்திரி, சட்டப் பேரவை உறுப்பினா் க.சொ.க.கண்ணன் உள்ளிட்டோா் உடனிருந்தனா்.