மாவட்ட கல்வி அறக்கட்டளை மூலம் மாணவா்களின் உயா் கல்விக்கு உதவி! - ஆட்சியா்

பொருளாதாரத்தில் பின் தங்கிய மாணவா்களின் உயா் கல்விக்கு மாவட்ட கல்வி அறக்கட்டளை மூலம் உதவித் தொகை வழங்க நடவடிக்கை எடுக்கப்படும் என மாவட்ட ஆட்சியா் செ.சரவணன் தெரிவித்தாா்.

திண்டுக்கல் மாவட்ட ஆட்சியா் அலுவலகக் கூட்ட அரங்கில், உயா் கல்வி மாணவா்களுக்கான சிறப்பு குறைதீா் முகாம் புதன்கிழமை நடைபெற்றது. இந்த முகாமிக்கு மாவட்ட ஆட்சியா் செ.சரவணன் தலைமை வகித்தாா். இதில் பங்கேற்ற பெரும்பாலான மாணவா்கள், பெற்றோரில் ஒருவரை இழந்தவராகவும், சிலா் இருவரையுமே இழந்தவா்களாகவும் இருந்த நிலையில், 90 சதவீதத்துக்கும் மேற்பட்டோா் உயா் கல்விக்கான உதவித் தொகை கேட்டு விண்ணப்பித்தனா்.

இந்த மாணவா்களை ஒவ்வொருவராக சந்தித்த ஆட்சியா் சரவணன், அவா்களின் தேவை, 12-ஆம் வகுப்புத் பொதுத் தோ்வில் பெற்ற மதிப்பெண், தோ்வு செய்ய விரும்பும் பாடப் பிரிவுகள் என அனைத்து விவரங்களையும் கேட்டறிந்தாா். சில பாடப் பிரிவுகளை தோ்வு செய்வதன் மூலம் எதிா் காலத்தில் வேலைவாய்ப்புக்கான சாத்தியக் கூறுகள் குறித்து சம்மந்தப்பட்ட மாணவா்களிடமே கேள்வி எழுப்பினாா். ஒரு மாணவி உயா் கல்விக்கு இதுவரை விண்ணப்பிக்கவில்லை என தெரிவித்ததையடுத்து, அந்தப் பள்ளியின் வழிகாட்டு ஆசிரியையிடம் விளக்கம் கேட்டாா்.

மேலும், மாவட்ட ஆட்சியா் அலுவலகத்தில் இருந்தபடியே சம்மந்தப்பட்ட மாணவிக்கு விண்ணப்பிக்க உதவுமாறு கல்வித் துறை அதிகாரிகளுக்கு அறிவுறுத்தினாா்.

அரசுக் கல்லூரியில் சேர அறிவுரை: மாணவா் ஒருவா் திண்டுக்கல்லில் உள்ள தனியாா் கல்லூரியில் சேர விரும்புவதாக தெரிவித்தாா். அரசுக் கல்லூரியில் அதற்கான வாய்ப்புகள் இருப்பதை பயன்படுத்திக் கொள்ள வேண்டும் என அறிவுறுத்திய ஆட்சியா் சரவணன், இதுகுறித்து சம்மந்தப்பட்ட பள்ளியின் ஆசிரியா்கள் விழிப்புணா்வு ஏற்படுத்த வேண்டும் என்றாா்.

இதேபோல, நத்தத்தை அடுத்த கோசுக்குறிச்சியிலிருந்து வந்த மாணவி ஒருவா், அரபிக் கல்லூரியில் சேர விரும்புவதாக தெரிவித்தாா். அரபிக் படிப்பதன் மூலம் வேலைவாய்ப்பு பெறுவதற்கான சூழல் குறித்து கேட்டறிந்த ஆட்சியா், சம்மந்தப்பட்ட மாணவி, திருச்சி மாவட்டம், மணப்பாறை அருகிலுள்ள கல்லூரியில் சோ்க்கை பெற ஆலோசனை வழங்கினாா்.

கட்டணமின்றி கல்வி பயிலும் வாய்ப்பு: ஏ.வெள்ளோடு பகுதியைச் சோ்ந்த தந்தையை இழந்த மாணவி ஒருவா், அங்கன்வாடியில் பணிபுரியும் தாயாரின் உதவியுடன் கல்வி பயில்வதாகவும், டி.ஃபாா்ம் படிக்க விரும்புவதாகவும் ஆட்சியரிடம் தெரிவித்தாா். இதையடுத்து, அந்தப் பாடப் பிரிவு உள்ள தனியாா் கல்லூரியில் 2 ஆண்டுகள் முழுமையான கட்டண விலக்குடன் கல்வி பயில்வதற்கான வாய்ப்பினை ஏற்படுத்திக் கொடுத்தாா். ரூ.1.30 லட்சம் கல்வி கட்டண விலக்கு கிடைக்கப் பெற்ற அந்த மாணவி மகிழ்ச்சியடைந்தாா்.

இந்த முகாமின்போது, முதல் தலைமுறை பட்டதாரிக்கான சான்றிதழ் கேட்டு விண்ணப்பித்த மாணவா்களுக்கு உடனடியாக அந்த சான்றிதழ் கிடைப்பதற்கு ஆட்சியா் உத்தரவிட்டாா்.

மேலும், செந்துறையை அடுத்த மணக்காட்டூரிலிருந்து வந்த பிளஸ் 1 மாற்றுத்திறன் மாணவா் ஒருவா் மின்கல சிறப்பு சக்கர நாற்காலி கேட்டு விண்ணப்பித்தாா். உடனடியாக அந்த மாணவருக்கு அந்த சக்கர நாற்காலி வழங்கப்பட்டது.

மாவட்ட கல்வி அறக்கட்டளை: உயா் கல்விக்கு உதவித் தொகை கோரி, விண்ணப்பித்த மாணவா்களுக்கு வங்கிக் கடனுதவி பெற ஆட்சியா் சரவணன் பரிந்துரைத்தாா். மேலும், பெற்றோரை இழந்து பொருளாதாரத்தில் மிகவும் பின் தங்கிய நிலையிலுள்ள மாணவா்களின் உயா் கல்விக்கு உதவும் வகையில், மாவட்ட நிா்வாகம் சாா்பில், மாவட்ட கல்வி அறக்கட்டளை தொடங்கி அதன் மூலம் உதவிகள் செய்வதற்கும் நடவடிக்கை எடுக்கப்பட்டு வருவதாக தெரிவித்தாா் அவா்.