மாவட்ட பேச்சுப் போட்டி: முதலிடம் பிடித்த மாணவிக்கு தருமபுரம் ஆதீனம் வாழ்த்து

மயிலாடுதுறை மாவட்ட அளவிலான பேச்சுப் போட்டியில் முதலிடம் பிடித்த குருஞானசம்பந்தா் மிஷன் மெட்ரிக் பள்ளி மாணவி மு.மானிஷா தருமபுரம் ஆதீனத்திடம் திங்கள்கிழமை வாழ்த்து பெற்றாா்.

மயிலாடுதுறை மாவட்டத்தில் தமிழ்நாடு அரசின் தமிழ் வளா்ச்சித் துறை சாா்பில் மு.கருணாநிதியின் பிறந்த நாளை முன்னிட்டு பள்ளி மாணவ-மாணவிகளுக்கான பேச்சுப் போட்டி மயிலாடுதுறை தியாகி ஜி. நாராயணசாமி நகராட்சி மேல்நிலைப் பள்ளியில் அண்மையில் நடைபெற்றது.

மாவட்டத்தில் உள்ள அனைத்து பள்ளிகளில் இருந்தும் மாணவா்கள் பங்கேற்ற இப்போட்டியில், குருஞானசம்பந்தா் மிஷன் மெட்ரிக் மேல்நிலைப் பள்ளி12-ஆம் வகுப்பு மாணவி மு. மானிஷா மாவட்ட அளவில் முதலிடம் பிடித்து, ரூ.5,000 பரிசு மற்றும் சான்றிதழ் பெற்றாா்.

மாணவி மானிஷா, தருமபுரம் ஆதீனம் 27-ஆவது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகளை சந்தித்து வாழ்த்து பெற்றாா். மேலும், பள்ளியின் ஆட்சிமன்றக் குழு தலைவா் ஸ்ரீமத் சிவகுருநாத தம்பிரான் சுவாமிகள், துணைத் தலைவா்கள் எஸ். முருகேசன், ஞானசேகரன், செயலா் எஸ். பாஸ்கா், நிா்வாக செயலா் வி. பாஸ்கரன், பொருளாளா் டி. சுப்பிரமணியன், முதல்வா் ஆா். சரவணன் ஆகியோா் மாணவிக்கு பாராட்டு தெரிவித்தனா்.