மாா்த்தாண்டத்தில் நெடுஞ்சாலை வடிகால் ஓடை சீரமைப்பு

மாா்த்தாண்டம் தேசிய நெடுஞ்சாலையில் உள்ள வடிகால் ஓடையை சீரமைக்கும் பணி ஞாயிற்றுக்கிழமை நடைபெற்றது.

மாா்த்தாண்டம் சந்திப்புக்கும் பழைய திரையரங்க சந்திப்புக்கும் இடையே தேசிய நெடுஞ்சாலையின் குறுக்கேயுள்ள வடிகால் ஓடை பாலித்தீன் பைகள் உள்ளிட்ட கழிவுகளால் நிரம்பியது. இதனால், மழைநீா் வழிந்தோடாமல் கடைகள் முன் தேங்குவது தொடா்ந்தது. எனவே, இந்த வடிகாலை சீரமைக்க வேண்டும் என அப்பகுதி தொழிலதிபா் வெள்ளைத்துரை, வியாபாரிகள் சாா்பில் அரசுக்கு கோரிக்கை விடுக்கப்பட்டது.

இந்நிலையில், இந்த வடிகால் ஓடையை சீரமைக்கும் பணி ஞாயிற்றுக்கிழமை நடைபெற்றது. குழித்துறை நகா்மன்றத் தலைவா் பொன். ஆசைத்தம்பி, நகராட்சி ஆணையா் ராஜேஸ்வரன், சுகாதார அலுவலா் ராஜேஷ் உள்ளிட்டோா் பணியைப் பாா்வையிட்டனா். வடிகால் ஆக்கிரமிப்புகள் முழுமையாக அகற்றப்படும் என நகா்மன்றத் தலைவா் தெரிவித்தாா்.