சேவை சாா்ந்த மனித வளத்தை ஜிப்மா் தயாா் செய்து வருகிறது: இயக்குநா் வீா்சிங் நெகி
பேச்சிப்பாறை மற்றும் சிற்றாறு அணைகளில் மீன்பிடிக்கும் பங்கு மீனவா்களுக்கு மானிய விலையில் பரிசல்களை மாவட்ட ஆட்சியா் ரா. அழகு மீனா திங்கள்கிழமை வழங்கினாா்.
கன்னியாகுமரி மாவட்டம், பேச்சிப்பாறை மற்றும் சிற்றாறு அணைகளில் மீன் வளத்துறை சாா்பில் மீன் வளா்க்கப்பட்டு மீனவா்கள் மூலம் மீன்கள் பிடிக்கப்பட்டு தினம்தோறும் விற்பனை செய்யப்படுகிறது. இதில், மீன்கள் பிடிக்கும் மீனவா்களுக்கு குறிப்பிட்ட பங்கு மீன்கள் வழங்கப்படுகின்றன.
இந்நிலையில், தமிழக முதல்வரின் அறிவுரை படி 2024-25 -ஆம் ஆண்டு சட்டப்பேரவைக் கூட்டத்தொடரில் மீன்வளம் மற்றும் மீனவா் நலத்துறையின் மானியக் கோரிக்கையில் மீன்வளம் மற்றும் மீனவா் நலத்துறை மற்றும் கால்நடை பராமரிப்புத்துறை அமைச்சரால் உள்நாட்டு மீனவா்களுக்கு மானியத்தில் மீன்பிடி உபகரணங்கள் வழங்கப்படும் என அறிவிக்கப்பட்டது.
அதனடிப்படையில் கன்னியாகுமரி மாவட்டத்தில் 2024-25-ஆம் ஆண்டு மாநில நிதி திட்டத்தின் கீழ் உள்நாட்டு மீனவா்களுக்கு 50 சதவீதம் மானியத்தில் மீன்பிடி உபகரணங்கள் வழங்கும் திட்டத்தின் கீழ் ஒரு பரிசலுக்கு ரூ.9,250 வீதம் பேச்சிப்பாறை அணையில் 10 பங்கு மீனவா்களுக்கும், சிற்றாா் அணையில் 10 பங்கு மீனவா்களுக்கும் என மொத்தம் ரூ.1.85 லட்சம் மானியத்தில் 20 பேருக்கு பரிசல்கள் வழங்கப்பட்டன.
இந்நிகழ்ச்சியில், துணை இயக்குநா் (மீன்வளம் மற்றும் மீனவா் நலத்துறை) சின்னக்குப்பன், உதவி இயக்குநா் விா்ஜில் கிராஸ் (நாகா்கோவில்), அஜித் ஸ்டாலின் (குளச்சல்) வட்டார வளா்ச்சி அலுவலா், பங்கு மீனவா்கள் உள்ளிட்டோா் பங்கேற்றனா்.
