மேற்கு வங்க வாக்களா் பட்டியலில் வங்கதேச போராட்டக்காரரின் பெயா்: புதிய அரசியல் சா்ச்சை

கொல்கத்தா: மேற்கு வங்க மாநில வாக்காளா் பட்டியலில் வங்கதேச போராட்டக்காரரின் பெயா் இடம்பெற்றிருப்பது மாநிலத்தில் புதிய அரசியல் சா்ச்சையை ஏற்படுத்தியுள்ளது.

மாநிலத்தில் சட்டவிரோத ஊடுருவலை அனுமதிப்பதாகவும், மாநில வாக்காளா் பட்டியலில் முறைகேடு நிகழ்ந்துள்ளதாகவும் ஆளும் திரிணமூல் காங்கிரஸ் மீது மாநில எதிா்க்கட்சியான பாஜக குற்றஞ்சாட்டியது.

வங்கதேசத்தில் கடந்த ஆண்டு ஆகஸ்ட் மாதம் மிகப் பெரிய அளவில் மாணவா் போராட்டம் நடந்தது. இடஒதுக்கீட்டுக்கு எதிரான இந்தப் போராட்டம், வன்முறையாக வெடித்தது. மாணவா்களின் இந்தப் போராட்டம் அண்டை நாட்டில் ஆட்சி மாற்றத்தை ஏற்படுத்தியதோடு, அங்கு பிரதமராக இருந்த ஷேக் ஹசீனா பதவியை ராஜிநாமா செய்துவிட்டு, இந்தியாவில் தஞ்சமடையும் நிலை உருவானது.

இந்த மாணவா் போராட்டத்தில் பங்கேற்ற நியூட்டன் தாஸ் என்ற நபா், மேற்கு வங்க மாநிலத்தில் வாக்காளராக இருப்பது பெரும் சா்ச்சையாகியுள்ளது. வங்கதேச போராட்ட புகைப்படங்கள், அந்தப் போராட்டங்களில் நியூட்டன் தாஸ் பங்கேற்றதை உறுதிப்படுத்தியுள்ளன.

இது சா்ச்சையானதைத் தொடா்ந்து, நிரந்தர கணக்கு அட்டை, ஆதாா் அட்டை உள்ளிட்ட ஆவணங்களுடன் தான் இந்தியக் குடிமகன்தான் என நியூட்டன் தாஸ் குறிப்பிட்டுள்ளாா். இதுதொடா்பாக அவா் வெளியிட்ட காணொலி பதிவில், ‘கடந்த 2014-ஆம் ஆண்டு முதல் மேற்கு வங்க மாநிலம் கக்திப் பகுதி வாக்காளராக இருந்து வருகிறேன். கடந்த 2017-இல் எனது வாக்காளா் அட்டை தொலைந்துவிட்ட நிலையில், உள்ளூா் எம்எல்ஏ மந்துரம் பகிரா உதவியுடன் புதிய வாக்காளா் அட்டையைப் பெற்றேன். மாநிலத்தில் கடந்த 2016-ஆம் ஆண்டு பேரவைத் தோ்தலில் எனது வாக்கைப் பதிவு செய்துள்ளேன். இந்த நிலையில், கடந்த 2024-ஆம் ஆண்டு வங்கதேசத்துக்குப் பயணம் மேற்கொண்டிருந்தபோது, எதிா்பாராத விதமாக மாணவா் போராட்டத்தில் சிக்கிக்கொண்டேன்’ என்று குறிப்பிட்டுள்ளாா்.

ஆனால், அவா் குடியிருப்பது இந்தியாவிலா அல்லது வங்கதேசத்திலா என்ற விவரத்தை அந்தக் காணொலியில் வெளியிடவில்லை.

இந்த நிலையில் கக்திப்பில் உள்ள நியூட்டன் தாஸின் உறவினா் தபன் தாஸ் கூறுகையில், ‘நியூட்டன் தாஸ் வங்கதேசத்தில் பிறந்தவா்தான். இருந்தபோதும், இரு நாடுகளிலும் அவா் வாக்குரிமையைப் பெற்றுள்ளாா். கரோனா பாதிப்புக்குப் பிறகு மேற்கு வங்கத்தில் உள்ள மூதாதையா்களின் நிலத்தை விற்பதற்காக வந்த அவா், பிறகு இங்கேயே தங்கிவிட்டாா். இரு நாடுகளிலும் வாக்காளராக நியூட்டன் தாஸ் பதிவு செய்திருப்பது முறையல்ல’ என்றாா்.

இந்நிலையில், மாநிலத்தில் தோ்தல் முடிவுகளை மாற்றியமைப்பதற்காக இதுபோன்ற சட்டவிரோத ஊடுருவல்களை ஆளும் திரிணமூல் காங்கிரஸ் ஊக்குவிப்பதாக பாஜக குற்றஞ்சாட்டியது.

இதுகுறித்து மாநில பாஜக தலைவா் சுகந்த மஜும்தாா் வெளியிட்ட பதிவில், ‘இத்தகைய சட்டவிரோத ஊடுருவலை திரிணமூல் காங்கிரஸும், முதல்வா் மம்தா பானா்ஜியுமே ஊக்குவிக்கின்றனா்’ என்று குறிப்பிட்டாா்.

திரிணமூல் காங்கிரஸ் செய்தித்தொடா்பாளா் குணால் கோஷ் கூறுகையில், ‘நட்டின் எல்லைப் பகுதிகளை மத்திய அரசும் எல்லைப் பாதுகாப்புப் படையினரும்தான் காக்கின்றனா். அந்த வகையில், மாநில அரசு தனது பங்கை சரிவர செய்து வருகிறது. மத்திய அரசுதான் பாதுகாப்பை உறுதிப்படுத்த வேண்டும்’ என்றாா்.